ರೈಲು ವಿಸ್ತರಣೆ

ಮಂಗಳೂರು-ಮುಂಬೈ ನಡುವಿನ ಮಂಗಳೂರು ಜಂಕ್ಷನ್-ಛತ್ರಪತಿ ಶಿವಾಜಿ ಟರ್ಮಿನಸ್(CST) ರೈಲು ಈಗ “ಮುಂಬೈ ಎಕ್ಸ್ ಪ್ರೆಸ್” (12133/34) ಎಂದು ಮರುನಾಮಕರಣಗೊಂಡಿದೆ. ಉದಯವಾಣಿಯ ವರದಿಯ ಪ್ರಕಾರ, ಇದರ ಹಿಂದೆ ಈ ರೈಲನ್ನು ಎರ್ನಾಕುಲಂಗೆ ವಿಸ್ತರಿಸುವ ಹುನ್ನಾರ ಕಂಡುಬಂದಿದೆ [೧]. ಬಹುಜನರ ಬೇಡಿಕೆಯ ಮೇರೆಗೆ ಪ್ರಾರಂಭಿಸಿದ್ದ ಈ ಎಕ್ಸ್ ಪ್ರೆಸ್ ರೈಲನ್ನು ಮುಂಬೈನ CST ಹಾಗೂ ಮಂಗಳೂರು ಜಂಕ್ಷನ್ ನಡುವೆ ಮಾತ್ರ ಓಡಿಸುತ್ತಿದ್ದರು. ಇದು ಮಂಗಳೂರು ಸಿಟಿ ಟರ್ಮಿನಲ್ಲಿಗೆ ಹೋಗುತ್ತಿರಲಿಲ್ಲ. ಕೇರಳಕ್ಕೆ ವಿಸ್ತರಿಸುವ ಅಂದಾಜು ಪ್ರಾರಂಭದಿಂದಲೇ ಇತ್ತೆಂದು ತೋರುತ್ತದೆ [೧], ಏಕೆಂದರೆ, ಕೇರಳದ ಕಡೆ ಮಂಗಳೂರಾಗಿ ಹಾದು ಹೋಗುವ ಎಲ್ಲಾ ರೈಲುಗಳು ಮಂಗಳೂರು ಜಂಕ್ಷನ್ ಆಗಿಯೇ ಹೋಗಬೇಕು. ಟರ್ಮಿನಲ್ಲಿಗೆ ಹೋದರೆ ಅಲ್ಲಿ ಎಂಜಿನ್ ದಿಕ್ಕು ಬದಲಿಸಿ ತಿರುಗಿ ಬರಬೇಕು. ಇದಾದಲ್ಲಿ ಇನ್ನೊಂದು ಮಂಗಳೂರಿಗಂತಿದ್ದ ರೈಲು ಕೇರಳಕ್ಕೆ ವಿಸ್ತರಣೆಗೊಳ್ಳುವುದು. ಈ ಹಿಂದೆ ಬೆಂಗಳೂರು-ಮಂಗಳೂರು ನಡುವೆ ಇದ್ದ “ಯಶವಂತಪುರ ಎಕ್ಸ್ ಪ್ರೆಸ್” ಕೇರಳದ ಕಣ್ಣೂರಿಗೆ ವಿಸ್ತರಿಸಲ್ಪಟ್ಟಿತ್ತು.

ಮೀಟರ್ ಗೇಜಿನಿಂದ ಬ್ರಾಡ್ ಗೇಜಿನ ಪರಿವರ್ತನೆಗೆ ಹತ್ತು ವರುಷಗಳೇ ಬೇಕಾದವು. ಅದರಲ್ಲಿ ಸಕಲೇಷಪುರ-ಮಂಗಳೂರು ಜಂಕ್ಷನ್ನಿನ ಕಾಮಗಾರಿಗೇ ಹೆಚ್ಚು ವರುಷಗಳು ಬೇಕಾದವು. ೧೯೭೯ರಲ್ಲೇ ಶುರುವಾದ ಮೀಟರ್ ಗೇಜ್ ಕಾಲದಲ್ಲಿ ಮಂಗಳೂರಿಂದ ಬೆಂಗಳೂರಿಗೆ, ನನಗೆ ನೆನಪಿದ್ದಂತೆ ಮೂರು ರೈಲುಗಳಾದರೂ ಇದ್ದವು. ನವೆಂಬರ್ ೨೦೦೫ರಲ್ಲಿ ಮುಗಿದ ಗೇಜ್ ಪರಿವರ್ತನೆ ಕಾರ್ಯದ ಬಳಿಕ ಗೂಡ್ಸ್ ರೈಲುಗಳು ಓಡಾಡುತ್ತಿದವು. ಇದಾಗಿ ಎರಡು ವರುಷದ ವರೆಗೆ ನೆಪಗಳನ್ನೋಡ್ಡಿದ ಬಳಿಕ, ರೈಲ್ವೇಯವರು ಅಂತೂ ಡಿಸೆಂಬರ್ ೨೦೦೭ರಲ್ಲಿ ಯಶವಂತಪುರ-ಬೆಂಗಳೂರು ರೈಲನ್ನು (ಯಶವಂತಪುರ ಎಕ್ಸ್ ಪ್ರೆಸ್) ಪ್ರಾರಂಭಿಸಿದರು. ಪ್ರತಿ ರಾತ್ರಿ ಮಂಗಳೂರು ಹಾಗೂ ಬೆಂಗಳೂರಿನಿಂದಿದ್ದ ಈ ರೈಲು ಮೈಸೂರು ಮಾರ್ಗವಾಗಿ ಹೋಗುತ್ತಿತ್ತು (~೧೨ ತಾಸಿನ ಪ್ರಯಾಣ). ಮೊದಲಿನ ಮೀಟರ್ ಗೇಜ್ ಬೆಂಗಳೂರು ರೈಲು ತುಮಕೂರು-ಅರಸೀಕೆರೆ ಮೇಲೆ ಓಡುತ್ತಿತ್ತು (~೧೦ ತಾಸಿನ ಪ್ರಯಾಣ). ಆದರೆ, ಡಿಸೆಂಬರ್ ೨೦೦೯ರಲ್ಲಿ ಹತ್ತು ವರುಷ ತಾಳ್ಮೆಯಿಂದ ಕಾದ ಮಂಗಳೂರಿಗೆ ಪ್ರಾರಂಭವಾಗಿ ಎರಡೇ ವರುಷದಲ್ಲಿ ಈ ರೈಲು ಕೇರಳದ ಕಣ್ಣೂರಿಗೆ ವಿಸ್ತರಣೆಯಾಗುವ ಉಡುಗೊರೆ ದೊರಕಿತು. ಎರಡು ತಿಂಗಳ ಹಿಂದೆ, ಎರಡು ದಿನಕ್ಕೊಮ್ಮೆ ವಾರಕ್ಕೆ ಮೂರು ಸಲ ಓಡುವ ಹಗಲು ರೈಲು ಜನರ ಒತ್ತಾಯದ ಮೇರೆಗೆ ಕಾರವಾರಕ್ಕೆ ಇತ್ತೀಚೆಗೆ (ಪುಣ್ಯಕ್ಕೆ ನಮ್ಮ ಕರಾವಳಿಗೇ) ವಿಸ್ತರಣೆಗೊಂಡಿದೆ[೨]. ಈ ರೈಲು ತುಮಕೂರು-ಅರಸೀಕೆರೆ ಮಾರ್ಗವಾಗಿ ಓಡುವುದು. ಮಂಗಳೂರಿನಿಂದ ಬೆಂಗಳೂರಿನೆಡೆಗೆ ಓಡುವುದು ಸಧ್ಯಕ್ಕೆ ಈ ಎರಡೇ ರೈಲುಗಳು.

ಕರ್ನಾಟಕದ ಬಂದರು ನಗರಿ ಮಂಗಳೂರು ತನ್ನ ರಾಜ್ಯದ ರಾಜಧಾನಿಗೆ ರೈಲಿನ ಮೂಲಕ ಈ ಬಗೆಯ ಸಂಪರ್ಕವಿರುವುದು ವಿಪರ್ಯಾಸ. ಈ ಎರಡು ನಗರಗಳ ನಡುವಿನ ಜನಸಂಚಾರ ಹೆಚ್ಚಿಗೆ ಇದ್ದು, ರೈಲ್ವೇಯವರಿಗೆ ಸರಿಯಾದ ರೈಲು ಸಂಪರ್ಕ ಸಾಧಿಸಿದಲ್ಲಿ ನಷ್ಟವಲ್ಲ, ಲಾಭವೇ. ಆದರೂ ಹಾಗೆ ಯಾಕಾಗುತ್ತಿಲ್ಲವೆಂಬುದೇ ಯಕ್ಷ ಪ್ರಶ್ನೆಯಾಗಿದೆ. ಇನ್ನೊಂದು ವಿಪರ್ಯಾಸವೇನೆಂದರೆ, ಮಂಗಳೂರಿನಿಂದ ಚೆನ್ನೈಗೆ ಇರುವ “ಚೆನ್ನೈ ಮೇಲ್” ಈಗಲೂ ಕೇರಳವಾಗಿ ತಮಿಳು ನಾಡಿನ ಕೊಯಮುತ್ತೂರಿನ ಮೂಲಕ ತುಂಬಾ ಸುತ್ತಾಗಿ ಹಾದು ಹೋಗುವುದು. ಈ ದಾರಿಯಲ್ಲಿ ರೈಲಿನಲ್ಲಿ ಚೆನ್ನೈಗೆ ಹೋದರೆ ಮಂಗಳೂರಿಂದ ಮುಂಬೈಗೆ ಹೋದಕ್ಕಿಂತ ಹೆಚ್ಚು ಹೊತ್ತು ಬೇಕಾಗುವುದು! [೩] [ಈ ಸ್ವಾರಸ್ಯಕರ ಬ್ಲಾಗ್ ಪೋಸ್ಟ್ ನೋಡಿ. ಆಂಗ್ಲ ಭಾಷೆಯಲ್ಲಿದೆ.] ಮಂಗಳೂರಿಂದ ಚೆನ್ನೈಗೆ ಹೋಗಲು ಈ ರೈಲಿನ ಪ್ರಯೋಜನವಾದರೂ ಏನು? ಇದರಿಂದ ಯಾರಿಗೆ ನಿಜವಾದ ಪ್ರಯೋಜನವೆಂದು ಬಿಡಿಸಿ ಹೇಳಬೇಕಾಗಿಲ್ಲ ತಾನೆ. ಈ ರೈಲು ಈಗ ಬೆಂಗಳೂರಾಗಿ ಓಡಿದರೆ ಅರ್ಥವಿರುತ್ತದೆ. ಆದರೆ, ಒಂದು ಪಕ್ಷ ಹಾಗಾದಲ್ಲಿ ಈ ರೈಲೂ ಕೇರಳದ ಯಾವುದೋ ಊರಿಗೆ ವಿಸ್ತರಣೆಗೊಂಡರೆ ಆಶ್ಚರ್ಯವೇನಿಲ್ಲ! ಕರಾವಳಿ ಕರ್ನಾಟಕದಿಂದ ರಾಜ್ಯದ ಇತರ ಭಾಗಗಳಿಗೆ ರೈಲು ಸಂಪರ್ಕ ಇಂದಿಗೂ ಸರಿಯಾಗಿಲ್ಲ. ಕರ್ನಾಟಕದ ರೈಲ್ವೇ ನಕಾಷೆಯ ಹಾಗೂ ವೇಳಾಪಟ್ಟಿಯ ನೋಡಿದರೆ ರಾಜ್ಯದಲ್ಲಿನ ರೈಲಿನ ವ್ಯವಸ್ಥೆ ಹೇಗಿದೆ ಎಂದು ಎಂಥವನಿಗೂ ಗೋಚರಿಸುವುದು. ಮಂಗಳೂರು ಹಾಗೂ ಮಂಗಳೂರು ಜಂಕ್ಷನ್ ರೈಲು ನಿಲ್ದಾಣವು ಈಗಲೂ ದಕ್ಷಿಣ ರೈಲ್ವೆಯ ಪಾಲ್ಘಾಟ್ ವಲಯದಲ್ಲಿದೆ. ಬಹುಕಾಲಿಕ ಆಗ್ರಹದ ಬಳಿಕವೂ ಈ ನಿಲ್ದಾಣಗಳು ದಕ್ಷಿಣ-ಮಧ್ಯ ರೈಲ್ವೆಯ ಮೈಸೂರು ವಲಯಕ್ಕೆ ಹಸ್ತಾಂತರಗೊಂಡಿಲ್ಲ.

ಈಗ ಕೇರಳಕ್ಕೆ ವಿಸ್ತರಣೆಗೊಳ್ಳಬಹುದಾದ “ಮುಂಬೈ ಎಕ್ಸ್ ಪ್ರೆಸ್” ಅನ್ನು ಹೊರತುಪಡಿಸಿ ಮಂಗಳೂರಿನಿಂದಲೇ ಮುಂಬೈಗೆ ಹೊರಡುವ ರೈಲೆಂದರೆ ಮಂಗಳೂರು ಸಿಟಿ ಟರ್ಮಿನಲ್ಲಿನಿಂದ ಹೊರಡುವ “ಮತ್ಸಗಂಧಾ ಎಕ್ಸ್ ಪ್ರೆಸ್” ಮಾತ್ರ. ರಾಜ್ಯದಲ್ಲಿ ರೈಲಿನ ಬಗೆಗೆ ರಾಜ್ಯದ ನಾಯಕರ ದಿವ್ಯ ನಿರ್ಲಕ್ಷ್ಯ ಮುಂದುವರೆಯುತ್ತಾ ಕನ್ನಡ ಕರಾವಳಿಯು ಉತ್ತಮ ರೈಲು ಸೇವೆಯಿಂದ ಇಂದಿಗೂ ವಂಚಿತವಾಗಿದೆ.

- ಪ್ರಲೇಖ

ಟಿಪ್ಪಣಿಗಳು:
[೧] ಮಂಗಳೂರು ಜಂಕ್ಷನ್‌ ಎಕ್ಸ್‌ಪ್ರೆಸ್‌ ಈಗ ಮುಂಬಯಿ ಎಕ್ಸ್‌ಪ್ರೆಸ್‌:ಕೇರಳಕ್ಕೆ ವಿಸ್ತರಣೆಗೆ ಪೀಠಿಕೆ : Udayavani | Dec 25, 2011
[೨]The Hindu:Yeshwanthpur-Mangalore express extended to Karwar
[೩] Karthik’s Log : From Mangalore to Chennai

ಚಿತ್ರ ಕೃಪೆ:
[೧] Train-2.jpg is a cropped image derived from 7032 HYB_Jambrung_Indian_Railways.jpg By HarshWCAM3 (IMG_0304Uploaded by oxyman) [CC-BY-SA-2.0], via Wikimedia Commons

ಕಣಜ | ಅಂತರಜಾಲ ಕನ್ನಡ ಜ್ಞಾನಕೋಶ

ಇತ್ತೀಚೆಗೆ  “ಕಣಜ” ಎಂಬ ಅಂತರ್ಜಾಲ ತಾಣದ ಬಗ್ಗೆ ತಿಳಿದು ಬಂತು. ಇದನ್ನು ನೋಡಲು ಹೋದಾಗ ಇದು ಕರ್ನಾಟಕ ಸರ್ಕಾರದ ಕರ್ನಾಟಕ ಜ್ಞಾನ ಆಯೋಗದ ಯೋಜನೆಯು ರೂಪಿಸಿ, ಇಂಟರ್‌ನ್ಯಾಶನಲ್ ಇನ್‌ಸ್ಟಿಟ್ಯೂಟ್ ಆಫ್ ಇನ್‌ಫಾರ್ಮೇಶನ್ ಟೆಕ್ನಾಲಜಿಯು (ಐಐಐಟಿ-ಬಿ) ಜಾರಿಗೊಳಿಸುತ್ತಿರುವ ಅಂತರಜಾಲ ಕನ್ನಡ ಜ್ಞಾನಕೋಶ ಎಂದು ತಿಳಿದುಬಂತು.

ಕನ್ನಡದಲ್ಲಿ ಇರುವ ಎಲ್ಲ ಬಗೆಯ ಸಾಹಿತ್ಯವನ್ನೂ ಕಲಿಕೆಗಾಗಿ ಸಾರ್ವಜನಿಕರಿಗೆ ನೀಡುವುದು ಈ ಯೋಜನೆಯ ಉದ್ದೇಶವಾಗಿದೆ. ಅಲ್ಲದೇ, ‘ಕಣಜದಲ್ಲಿ ನಾವು-ನೀವೂ ಸಹ ಬರೆಯಬಹುದು . ಕನ್ನಡ ಭಾಷೆಯಲ್ಲಿ ಯಾವುದೇ ಮಾಹಿತಿಗೆ ಏಕೈಕ ಮೂಲವಾಗುವ, ವಿವಿಧ ಸಂಸ್ಥೆ ಮತ್ತು ವ್ಯಕ್ತಿಗಳಿಂದ ಮಾಹಿತಿಗಳನ್ನು ಪಡೆದು ಅವುಗಳನ್ನು ಸಾರ್ವಜನಿಕ ಬಳಕೆಗಾಗಿ ಕನ್ನಡ ಭಾಷೆಯಲ್ಲಿ, ವಿದ್ಯುನ್ಮಾನ ರೂಪದಲ್ಲಿ, ವಿಶ್ವವ್ಯಾಪಿ ಜಾಲತಾಣದಲ್ಲಿ (www.kanaja.in) ಪ್ರಕಟಿಸುವುದು “ಕಣಜ” ದ ಉದ್ದೇಶವಾಗಿದೆ. ಮಾಹಿತಿಗಳು ಆದಷ್ಟೂ ಅಧಿಕೃತವೂ, ಖಚಿತವೂ, ಸಂಪೂರ್ಣವೂ, ಗುಣಮಟ್ಟದ್ದೂ ಆಗಿರುವಂತೆ ತಜ್ಞರ ನೆರವನ್ನು ಪಡೆದು ಎಲ್ಲ ಮಾಹಿತಿಗಳನ್ನೂ ಪರಾಮರ್ಶೆಗೆ ಒಳಪಡಿಸಿಯೇ ಪ್ರಕಟಿಸುವುದು. ಹೆಚ್ಚಿನ ಮಾಹಿತಿಗೆ ಈ ಕೊಂಡಿಯನ್ನು ಒತ್ತಿರಿ ಹಾಗೂ, `ಕಣಜ’ ಜಾಲತಾಣದಲ್ಲಿ ಪ್ರತಿದಿನವೂ ಒಂದು ಹೊಸ ಲೇಖನವು ಪ್ರಕಟವಾಗುವುದು. ವಿವಿಧ ವಿಷಯತಜ್ಞ ಲೇಖಕರು ತಿಂಗಳಿಗೊಮ್ಮೆ ಕನ್ನಡಿಗರ ಅರಿವಿನ ವಿಸ್ತಾರಕ್ಕೆ ನೆರವಾಗುವ ಲೇಖನಗಳನ್ನಿಲ್ಲಿ ಬರೆಯುವರು. ಕನ್ನಡ ಭಾಷೆ, ಸಾಹಿತ್ಯ, ವಿಜ್ಞಾನ, ತಂತ್ರಜ್ಞಾನ, ಕೃಷಿ, ರೈತರ ಅನುಭವ, ಕಲೆ, ಸಂಗೀತವೆಂಬಂತೆ ಹಲವಾರು ಅಂಕಣಗಳಿವೆ. ಕನ್ನಡ/ಆಂಗ್ಲದಲ್ಲಿ ಟೈಪ್ ಮಾಡುವ ಸೌಲಭ್ಯವೂ ಇದೆ (ಕಣಜದ ಪುಟಗಳಲ್ಲಿ ಬಲ ಮೇಲ್ಭಾಗದಲ್ಲಿ ಈ ಸೌಲಭ್ಯ ಕಾಣಿಸುವುದು). ಇದಲ್ಲದೇ, ಉಪಯುಕ್ತಕಾರಿ ಕನ್ನಡ ಶಬ್ದಕೋಶವನ್ನೂ ಹೊಂದಿದೆ.

ಒಂದು ವಿಪರ್ಯಾಸವೇನೆಂದರೆ, “ಕಣಜ” ಶಬ್ದಾರ್ಥದ ಶೋಧನೆಗೆ ಯಾವುದೇ ಫಲಿತಾಂಶ ಒದಗಲಿಲ್ಲ! ಮುಂದಿನ ದಿನಗಳಲ್ಲಿ ಶಬ್ದಕೋಶದ ಅಭಿವೃದ್ಧಿಯಾಗುವುದೆಂದು ಬಯಸುವೆ. ಕನ್ನಡವನ್ನು ಉಳಿಸುವ, ಹಾಗೂ ಅಂತರ್ಜಾಲ ಮಾಧ್ಯಮದ ಮೂಲಕ ಕನ್ನಡವ ಪಸರಿಸುವ ನಿಟ್ಟಿನಲ್ಲಿ ರೂಪಿಸಿದ ಕರ್ನಾಟಕ ಸರ್ಕಾರದ ಕರ್ನಾಟಕ ಜ್ಞಾನ ಆಯೋಗದ ಈ ಯೋಜನೆ ನಿಜಕ್ಕೂ ಸಂತಸದ ಸುದ್ದಿ. ಕನ್ನಡವನ್ನು ಉಳಿಸೋಣ, ಬೆಳೆಸೋಣ.

ಇಂದಿನ ವಿಜಯ ಕರ್ನಾಟಕದಲ್ಲಿ ಪ್ರಕಟವಾಗಿರುವ (ಕೆಪಿಎನ್) ನ ಪೋಟೋ… … Read More

via CAUTIOUSMIND

ಅರೆರೆ! ಇದೇನಪ್ಪಾ… ಒಮ್ಮೆ ಕೆರೆ ಗಿರೆ ಅಂತ ಏನೆಲ್ಲಾ ಒದರಿ ಹೋದ ದಾರಿಹೋಕ ನಿದ್ದೆಯಿಂದೆದ್ದನೇ ಅಂದುಕೊಂಡಿರಾ… ಹಾಗೇನಿಲ್ಲ. ಇಲ್ಲಿ ನಿದ್ದೆ ಮಾಡೋರು ಬಹಳಷ್ಟು ಮಂದಿ ಇದಾರೆ. ದೊಡ್ಡದಾದ ಊರಲ್ಲಿ ದಾರಿಹೋಕರಿಗೇನು ಕಮ್ಮಿಯೇ? ರಸ್ತೆಗಿಳಿದರೆ ಸಿಗುವರೇ ವಿವಿಧ ಬಗೆಯ ದಾರಿಹೋಕರು. ಆಹಾ! ಎಷ್ಟೊಂದು ವಿಧ! ಇವರಲ್ಲಿ ಒಂದು ವಿಧದ ಬಗ್ಗೆ ಇವತ್ತು ನಿಮ್ಮ ತಲೆ ತಿನ್ನಲು ಬಯಸುತ್ತೇನೆ. ಇವರು ಒಂಥರಾ ಅಂತಸ್ತು ಹುಚ್ಚು (“status craze”) ಇರೋ ವಿಧಕ್ಕೆ ಸೇರುತ್ತಾರೆ ನೋಡಿ. ಇವರಲ್ಲಿ ಕೆಲವರು ಶ್ವಾನ ಪ್ರೇಮಿಗಳೂ ಆಗಿರಬಹುದು. ಆದರೆ ಮೊದಲನೇ ವಿಧವೇ ಹೆಚ್ಚೆನಿಸುತ್ತದೆ. ಈಗಾಗಲೇ ಇದೇನು ರಗಳೆ ಅಂತ ಹೊಳೆದಿರಬೇಕು ನಿಮಗೆ. ಪೀಠಿಕೆ ಸಾಕು. ನೇರವಾಗಿ ವಿಷಯಕ್ಕೆ ಬರೋಣ. (ಕ್ಷಮಿಸಿ, ಅಷ್ಟೊಂದು ನೇರವಾಗಿ ಅಲ್ಲ..)

::ಶ್ವಾನಮತ್ತ ನಾಗರೀಕರು::
ಬೆಂಗಳೂರಿನಲ್ಲಿ ಅಂದು ಧಾರಾಕಾರ ಮಳೆ. ಎಲ್ಲೆಲ್ಲೂ ಉಕ್ಕಿ ಹರಿಯುವ ನೀರು. ಚರಂಡಿಯಲ್ಲಿ ಮಾತ್ರವಲ್ಲ ಸ್ವಾಮಿ, ದಾರಿಯಲ್ಲೂ. ಈ ಮಳೆನೀರು ನೆಲ ಮುಟ್ಟುವಾಗ ಎಷ್ಟು ಶುದ್ಧವಾಗಿರುವುದೋ* (*ವಾಯುಮಂಡಲದಿಂದ ಮಲಿನಗೊಂಡಿರದಿದ್ದಲ್ಲಿ) ನೆಲಕ್ಕಪ್ಪಳಿಸಿದಂತೆಯೇ ನೆಲದ ಎಲ್ಲಾ ಅಂಶಗಳನ್ನೂ ತನ್ನೊಡನೆ ಕರೆದುಕೊಂಡು ಹರಿಯತೊಡಗುತ್ತೆ. ನೀರು ಒಂಥರಾ ನಿಜವಾದ ಜಾತ್ಯಾತೀತವಾದಿ ನೋಡಿ. ಅದಕ್ಕೆ ಭೇದ ಭಾವ ತಿಳಿಯದು… ನೀನು ಮಣ್ಣು, ನೀನು ಮರಳು, ನೀನು ಕಸ, ನೀನು ಕಡ್ಡಿ, ನೀನು ನಾಯಿ ಹೇಲು… ಅಂತೆಲ್ಲಾ ಹೇಳಿ ತನ್ನೊಡನೆ ಕರೆದೊಯ್ಯದೇ ಇರದು. ರಸ್ತೆಯಲ್ಲಿ ನಡೆದಾಡುವಾಗ ಈ ನೀರಲ್ಲಿ ನಮ್ಮ ಪಾದಗಳ/ಪಾದುಕೆಗಳ ಪಾವನ ಮಾಡಿಸದೇ ಹೋಗುವಂತಿಲ್ಲ. ಮಣ್ಣು, ಕಸ, ಕಡ್ಡಿ ಯೆಲ್ಲಾ ಓಕೆ! ಆದರೆ, ನೀರಲ್ಲಿ ಅರ್ಧ ಕರಡಿದ ನಾಯಿ ಹೇಲು ಬೇಕೇ?! ….

ನಿಮ್ಮ ವಾಂತಿ ಮಾಡುವ ಕಾರ್ಯ ಮುಗಿದಲ್ಲಿ ಮುಂದೆ ಓದಿ….

ಇನ್ನೂ ಬಂದಂತನಿಸುತ್ತಿದೆಯೇ? ನೀವು ಶೀಘ್ರ ವಾಂತಿ ಬರುವವರಾದಲ್ಲಿ ಮುಂದೆ ಓದಬೇಡಿ. ಮನಸ್ಸು ಹಗುರಾಗಿಸಲು ಪ್ರಕವಿಯ ವಲಯಕ್ಕೆ ಭೇಟಿ ನೀಡಿ. ಇಲ್ಲವಾದಲ್ಲಿ ಮುಂದುವರೆಸಿ….

ಹೇಲುತ್ತಿರುವ ನಾಯಿ

ಹೇಸಿಗೆಯೆನಿಸಿತೇ? ಅನಿಸದೇ ಇರದು. ಇದನ್ನು ಅಕ್ಷರ ರೂಪದಲ್ಲಿ ಓದಿದಾಗಲೇ ಹೀಗಾದಲ್ಲಿ, ಇನ್ನು ಇದನ್ನು ಕಣ್ಣಾರೆ ಕಾಣುವ (ಅದೃಷ್ಟ ನೆಟ್ಟಗಿರದಿದ್ದಲ್ಲಿ ಇದನ್ನು ಮೆಟ್ಟುವ) ನಮ್ಮಂತಹ ದಾರಿಹೋಕರಿಗಾಗುವ ಪಾಡೇನೆಂದು ಅರ್ಥವಾಗಿರಬೇಕು. “ಸ್ವಚ್ಛ ಬೆಂಗಳೂರು” ಎಂದೆಲ್ಲಾ ಗೋಡೆಗಳನ್ನೆಲ್ಲಾ ಅಂದಗೊಳಿಸುತ್ತಿರುವ ಬಿ.ಬಿ.ಎಂ.ಪಿ ಯವರ ಪಾದವಿನ್ನೂ ಈ ನೀರಿನಲ್ಲಿ ಪಾವನವಾದಂತಿಲ್ಲ. ಬಣ್ಣ ಬಣ್ಣದ ಚಿತ್ರ ಬಿಡಿಸಿ ಕಣ್ಣುಗಳನ್ನು ಮೂರ್ಖರನ್ನಗಿಸಬಹುದೇ ಹೊರತು, ಮೂಗನ್ನಲ್ಲ, ಪಾದುಕೆಗಳನ್ನಲ್ಲ. ಯಾಕ್ರೀ, ನಾಯಿ ಹೇಲೊಂದೇ ಪಾವಗೊಳಿಸುತ್ತೆಯೇ ಹರಿವ ನೀರನ್ನು? ಎಲ್ಲೆಂದರೆಲ್ಲಿ ಮಾಡಿದ ಉಚ್ಚಿಯೇನು ನೀರಲ್ಲಿ ಬೆರೆಯದೇ, ಎಂದೆಲ್ಲಾ “ಶ್ವಾನ ಪ್ರಿಯರು” ಈ ಕ್ಷಣವೇ ಸವಾಲೆಸೆಯಲು ಹಲ್ಲು ಮಸೆಯುತ್ತಿರುತ್ತಾರೆ. ಅದು ಬೇರೆ ವಿಷಯ ಬಿಡಿ. ಹಣ ಪಾವತಿಸಿ ಯಾವ ಮುಠ್ಠಾಳ ಉಚ್ಚಿ ಮಾಡುವನು? ಉಚ್ಚಿ ಮಾಡಲೂ ತೆರಿಗೆಯೇ? ಅದರ ಬದಲು, ಉಚಿತ ಮೂತ್ರಾಲಯಗಳ ತೆರೆದರೆ ನಿಜವಾದ ಉಪಕಾರವಾಗುವುದು ನಾಗರೀಕ ಸಮಾಜಕ್ಕೆ. ಇದು ಬೇರೆ ರಗಳೆ ಬಿಡಿ, ಈ ಬಗ್ಗೆ ಮುಂದಿನ ಸಾರಿ ತಲೆ ತಿನ್ನೋಣ. ಸಧ್ಯ ನಾಯಿ ಹೇಲಿಗೆ ವಾಪಸ್ಸು ಬರೋಣ…

ಇದು ಶ್ವಾನಪ್ರಿರಿರುವ ಬಹುತೇಕ ಎಲ್ಲಾ ವಲಯಗಳಲ್ಲೂ ದಾರಿಯಲ್ಲಿ ಬೆಳಬೆಳಗ್ಗೆ ಕೆಲಸಕ್ಕೆ ಹೊರಟಾಗ ಶುಭೋದಯ ಹೇಳಲು, ಸಂಜೆ ಹಿಂತಿರುಗಿ ಬಂದಾಗ ನಿಮ್ಮ ಪಾದಗಳ ಮುತ್ತಿಕ್ಕಿ ಸ್ವಾಗತಿಸಲು ಪ್ರೀತಿಯಿಂದ ನೀವು ಬರುವ ದಾರಿ ನೋಡುತ್ತಿರುತ್ತವೆ. ಇಲ್ಲವಾದಲ್ಲಿ, ವಿವಿಧ ಆಕಾರಗಳ, ವಿವಿಧ ಬಗೆಯ ನಾಯಿಗಳ ಪಟ್ಟಿ ಹಿಡಿದು ಅದಕ್ಕೆ “ವಾಕಿಂಗ್” ಮಾಡಲು ಕರೆತಂದಿರುವ ಮಹನೀಯ ದಾರಿಹೋಕರು ಕಾಣಸಿಗುತ್ತಾರೆ. ಅದೆಂತಹಾ ನಾಯಿಗಳೋ… ದೈತ್ಯಾಕಾರದ ನಾಯಿಗಳು, ಭೂತಾಕಾರದ ನಾಯಿಗಳು, ಇಲಿಯಾಕಾರದ ನಾಯಿಗಳು, ಮತ್ತು “ಮಿನಿ”, “ಮೈಕ್ರೋ” ನಾಯಿಗಳೂ ಸಹ! ದೈತ್ಯಾಕಾರದ ನಾಯಿಗಳು! ಮನಸ್ಸು ಮಾಡಿದರೆ ತಮ್ಮ ಶ್ವಾನಪ್ರಿಯನನ್ನು ಬೇಕೆಂದಲ್ಲಿ ಸಲೀಸಾಗಿ ಎಳೆದುಕೊಂಡು ಹೋಗುವಂತಿರುತ್ತವೆ. ಅವುಗಳ ಆಕಾರದಂತೆಯೇ ಅವುಗಳ ಹೇಲುಗಳೂ ಬೃಹದಾಕಾರದ ಹೇಲುಗಳು. (ಆದರೆ ಮಧ್ಯಮ, ಚಿಕ್ಕ ನಾಯಿಗಳ ಹೇಲೇನು ಬಹಳ ಕಮ್ಮಿಯಿರುವುದಿಲ್ಲ.) ಈ ನಾಯಿಗಳು ನಮ್ಮೂರಿನ ತಿರುಬೋಕಿ ನಾಯಿಗಳಂತಲ್ಲ ಸ್ವಾಮಿ, ಇವೇನು ಸಾಮಾನ್ಯ ಕಂತ್ರಿ ಕಜ್ಜಿ ನಾಯಿಗಳಾ? ಅಲ್ವೇ ಅಲ್ಲ! ನಿಲ್ಲು ಅಂದರೆ ನಿಲ್ಲುತ್ತವೆ, ಕೂರು ಅಂದ್ರೆ ಕೂರುತ್ತವೆ, ಆಡು ಅಂದರೆ ಆಡುತ್ತವೆ, ಮಲಗು ಅಂದರೆ ಮಲಗುತ್ತವೆ, ದಾರಿಯಲ್ಲಿ ಹೇಲು ಅಂದರೆ ಹೇಲುತ್ತವೆ. ಎಲಾ ಇವರಾ! ಎಷ್ಟೊಂದು ವಿಧೇಯ ಕುನ್ನಿಗಳು ನೋಡಿ. ಇವುಗಳು ಬೀದಿಯಲ್ಲಿ ಹೊರಳಾಡುವುದಿಲ್ಲ, ಎಲ್ಲೆಂದರಲ್ಲಿ ಮಲಗುವುದಿಲ್ಲ, ಸಿಕ್ಕಸಿಕ್ಕಿದುದೇನನ್ನೂ ತಿನ್ನುವುದಿಲ್ಲ. ಇವುಗಳು ದಿನವಿಡೀ ಮನೆಯೊಳಗೇ ಹಾಯಾಗಿ ಓಡಾಡಿಕೊಂಡು, ಶುಚಿಯಾಗಿರುವ ನೆಲದ ಮೇಲೆಯೇ ಹೊರಳಾಡಿಕೊಂಡು, ಪೆಡಿಗ್ರಿಯನ್ನೇ ಬಕಾಸುರನಂತೆ ತಿಂದುಕೊಂಡಿರುತ್ತವೆ. ಇವುಗಳು ಸಾಮಾನ್ಯ ಶ್ವಾನ ಪ್ರಜೆಗಳಲ್ಲ ಸ್ವಾಮೀ, “aristocratic” ಶ್ವಾನ ಪ್ರಜೆಗಳು. ಎಲ್ಲವೂ ಶುಚಿಯಾಗಿರಬೇಕು ಇವುಗಳಿಗೆ. ಆದರೆ ಹೇಲಲು ಸಾರ್ವಜನಿಕ ರಸ್ತೆಯೇ ಬೇಕು. ಇಲ್ಲವಾದಲ್ಲಿ, ಕಾಲುದಾರಿಯೇ* (*ಪ್ರೀತಿಯ ಕಂಗ್ಲೀಷ್ ಬಾಂಧವರೇ, ಕಾಲುದರಿಯೆಂದರೆ footpath) ಬೇಕು. ಆ ನಾಯಿಯ ಊಟ, ತಿಂಡಿ, ಸ್ನಾನ, ಓಡಾಟ, ಒಡನಾಟ ಎಲ್ಲಾ ಮನೆಯೊಳಗೆ. ಹೇತುಹಾಕೋ ಕೆಲಸವೊಂದು ಮಾತ್ರ ದಾರಿಯಲ್ಲಿ. ಭಲೇ ಕುನ್ನಿಗಳೇ ಇವುಗಳು! ಆದರೆ, ನಿಜವಾಗಿ ಹೇಳಬೇಕೆಂದರೆ, ಇದರಲ್ಲಿ ಆ ನಾಯಿಗಳ ತಪ್ಪಿಲ್ಲ. ಅಂತಹ ಶ್ವಾನಗಳು ಯಾವ ರೀತಿ ಜೀವಿಸುತ್ತದೆ? ಅದಕ್ಕೆ ಸ್ವಾತಂತ್ರವಿದೆಯೇ? ಯಾವತ್ತೂ ಕುತ್ತಿಗುಗೆ ಪಟ್ಟಿ, ಹುಟ್ಟಿನಿಂದ ಸಾವಿನವರೆಗೂ ಗೃಹ ಬಂಧನ. ಇದು ಯಾಕೆ ಪ್ರಾಣಿ ಹಿಂಸೆಯೆಂದು ಪರಿಗಣಿಸಲ್ಪದುವುದಿಲ್ಲ? ಪ್ರಾಣಿ ಹಿಂಸೆ ಹಾಗಿರಲಿ, ಈಗ ದಾರಿಹೋಕ ಹಿಂಸೆಗೆ ಬರೋಣ. ನಾಯಿ ಹೇಲು ಎಲ್ಲಿದೆಯೋ ಎಂದು ಹುಡುಕುತ್ತಾ ಓಡಾಡುವ ಸಾಹಸ ಯಾವತ್ತೂ ದ್ವಿಚಕ್ರ/ತ್ರಿಚಕ್ರ/ಚತುರ್ಚಕ್ರ ವಾಹನಗಳಲ್ಲೆ ಓಡಾಡುವ ಶ್ವಾನಪ್ರಿಯರಿಗೆಲ್ಲಿ ತಿಳಿದಿದೆ? ಕುರುಡು ಬಿ.ಬಿ.ಎಂ.ಪಿ ಯವರನ್ನು ಮರೆತುಬಿಡಿ, ತಮ್ಮ ನಾಯಿಯನ್ನು ದಾರಿಯಲ್ಲಿ ಹೇಲು ಹಾಕಿಸುವರನ್ನು ಹಿಡಿದು ೫೦೦ ರೂಪಾಯಿ ದಂಡ ಹಾಕಿದರೆ, ಓಳ್ಳೆಯ ಹಣ ಗಳಿಸಬಹುದಿತ್ತು ಅವರಿಗೆ. ಇಂತಹ ಶ್ವಾನಪ್ರಿಯರಿಗೆ, ನಾಲ್ಕೈದು ನಾಯಿಗಳನ್ನು ತಂದು ಅವರ ಬಾಗಿಲ ಎದುರೇ ಆ ನಾಯಿಗಳು ಹೇತು ಹಾಕುವಂತೆ ಮಾಡಬೇಕು, ಬುದ್ಧಿ ಬರಲು. ಮಂಗನ ಕೈಯಲ್ಲಿ ಮಾಣಿಕ್ಯವೆಂಬ ಗಾದೆ ಹಳತಾಯಿತು. “ಕೋತಿಯ ಕೈಯ್ಯಲ್ಲಿ ನಾಯಿ” ಎಂಬುದು ಹೊಸತು… ದುರದೃಷ್ಟಕ್ಕೆ, ಈ ಶ್ವಾನಮತ್ತ ನಾಗರೀಕರು (ಅನಾಗರೀಕರೆಂದರೆ ಹೆಚ್ಚು ಅರ್ಥಪೂರ್ಣ. ಅಲ್ವಾ..) ಈಚೆಗೆ ಜಾಸ್ತಿಯಾದಂತೆ ತೋರುತ್ತಿದ್ದಾರೆ. ಇವರ ಸಂಖ್ಯೆ ಹೀಗೆಯೇ ಹೆಚ್ಚುತ್ತಿದ್ದರೆ ಮುಂದೊಂದು ದಿನ ರಸ್ತೆಗೆ ಡಾಂಬರ್ ಹಾಕೋ ಅಗತ್ಯವೇ ಇರುವುದಿಲ್ಲ. ಜಲ್ಲಿಯಲ್ಲಿ ಮಿಶ್ರಿತ ನಾಯಿಹೇಲಿನ ಮೇಲೆಯೇ ರೋಡ್ ರೋಲರ್ ಓಡಿಸಿದರೆ ರಸ್ತೆ ಸಿದ್ಧ! ಡಾಂಬರ್ ಹಾಕಿ ಅದೇನು ಸಾಧಿಸಿದಂತಾಗುವುದು? ಹೇಗೂ ರಸ್ತೆ ನಾಯಿ ಹೇಲಲ್ಲೇ ಮುಳುಗುವುದು ತಾನೆ… ಅಲ್ಲ, ಅದ್ಯಾವ ಪುರುಶಾರ್ಥಕ್ಕಾಗಿ ಈ ಥರದ ನಾಯಿ ಸಾಕಣೆ? ರಸ್ತೆಯೆಲ್ಲ ನಾಯಿ ಹೇಲಿನ ಗೊಬ್ಬರ ಉತ್ಪಾದನೆ ಕೇಂದ್ರವನ್ನಾಗಿಸಲೇ? ನಮ್ಮಂತಹ ಬಡ ದಾರಿಹೋಕರ ಪಾದುಕೆಗಳ ಪಾವನಗೊಳಿಸಲೇ?

ನಂಗೊತ್ತಿಲ್ಲಪ್ಪಾ.....

ಇಲ್ಲಿಯವರೆಗೆ ಓದಿದಾಕ್ಷಣ, ನಮ್ಮನ್ನೇ ಏಕೆ ದೂರುತ್ತೀರ? ಯಾವುದೋ ಬೀದಿನಾಗಳ ಕೃತ್ಯವನ್ನು ನಮ್ಮ ಮುಗ್ಧ ಕುನ್ನಿಯ ಮೇಲೆ ಯಾಕೆ ಹೊರಿಸುತ್ತೀರ? ಎಂದೆಲ್ಲ ಶ್ವಾನಪ್ರಿಯರು ಕೂಗಾಡಲು ಶುರುಹಚ್ಚಿಕೊಳ್ಳುತ್ತಾರೆ. ಶ್ವಾನಪ್ರಿಯರೆಂದರೆ ತಪ್ಪಾದೀತು. ನಿಜವಾದ ಶ್ವಾನಪ್ರಿಯಗೆ ಅವಮಾನವಾದೀತು. ಇವರು ಶ್ವಾನಮತ್ತರು. ಇವರು ಇರುವಂತಹ ಏರಿಯಾಗಳಲ್ಲಿ ಬೀದಿನಾಯಿಗಳು ಕಾಣಸಿಗುವುದೇ ಅಪರೂಪ. ಇನ್ನು ಕೊಳಗೇರಿಗಳ, ಬೇರೆ ಏರಿಯಾಗಳ ವಿಷಯ ಬಿಡಿ, ಅದು ಬೇರೆ ವಿಷಯ. ಇದು ಒಂಥರಾ ಎಲ್ಲಾ ಸಂಗತಿಗಳಲ್ಲೂ ನಮ್ಮಲ್ಲಿ ಕಂಡು ಬರುತ್ತೆ. ನಮ್ಮ ಮನೆ ಶುಚಿಯಾಗಿರಬೇಕು. ರಸ್ತೆಯಿರುವುದೇ ಕಸ ಹಾಕಲು, ಹೊಲಸು ಮಾಡಲು. ಅಲ್ಲವೇ? ಇನ್ನು ಚ್ಯೂಯಿಂಗ್ ಗಮ್ ತಿಂದು ಎಲ್ಲೆಂದೆರಲ್ಲಿ ಉಗಿಯುವವರು ಬೇರೆ. ಅವರೆಲ್ಲಾ ಹಾಗಿರಲಿ. ಇಂತಹ ಶ್ವಾನಮತ್ತರಿಗೆ ಏನು ಮಾಡಬೇಕು? ಇವತ್ತಿಗೆ ಇಷ್ಟು ರಗಳೆ ಸಾಕು. ಪ್ರಿಯ ದಾರಿಹೋಕರೇ, ನಿಮ್ಮ ಪಾದ ಪಾವನವಾಗದಂತೆ ಎಚ್ಚರ ವಹಿಸಿ.

ಇಂತೀ ನಿಮ್ಮ ಪ್ರೀತಿಯ,
ದಾರಿಹೋಕ

ಪ್ರಲೇಖ
©2009 Pradeep Features. All rights reserved.

ಕೆರೆ ಪುರಾಣ

ಪ್ರಲೇಖ
©2009 Pradeep Features. All rights reserved.

ಚಿತ್ರ ಕೃಪೆ:
Sankey_tank.jpg By Nvvchar (Own work) [CC-BY-SA-3.0 or GFDL], via Wikimedia Commons

…………………………………………………………………………………
…………………………………………………………………………………’
…………………………………………………………………………………
…………………………………………………………………………………
…………………………………………………………………………………
…………………………………………………………………………………
          

.          

.          

.          

.          

.          

.          

” You have just been APRIL FOOLed by me!”
– Pralekha

” ನಿಮ್ಮನ್ನು ಈಗಷ್ಟೇ ಎಪ್ರಿಲ್ ಫೂಲ್ ಮಾಡಿದೆ!”

– ಪ್ರಲೇಖ(Pralekha)
©2009 Pradeep Features. All rights reserved.

ವೆಂಕಟ ಇನ್ ಸಂಕಟ

   ಅಂದ ಹಾಗೆ, ಹೋದ ರವಿವಾರ, ಹೊರಟೆವು, “ವೆಂಕಟ”ನ ನೊಡಲು. “ಸಂಕಟ” ಪಡಲು! ಚೆನ್ನಾಗಿರುವ ಹಾಸ್ಯ ಚಿತ್ರವೆಂದು, ಡಬ್ಬಾ ಕ್ಲೈಮಾಕ್ಸ್ ಎಂದೂ ಇದ್ದ ವಿಶ್ಲೇಷಣೆ ಓದಿದ್ದೆ. ವಿಶ್ಲೇಷಕನ್ನ ಹಿಡಿದು ಒದೆಯಬೇಕೆಂದೆನಿಸಿತು, “ಸಂಕಟ”ಪಟ್ಟ ಮೇಲೆ. ಅಂತೂ ಡಬ್ಬಾ ಕ್ಲೈಮಾಕ್ಸ್ ಅನ್ನೋ ಸತ್ಯ ಹೇಳಿದ್ನಲ್ಲಾ, ಬಿಡಿ… ಅಭಿನಯದಲ್ಲೇನೂ ಕಡಿಮೆಯಿಲ್ಲ. ರಮೇಶ್, ಉಮಾಶ್ರೀ, ಮು.ಮ ಚಂದ್ರು, ಕರಿಬಸವಯ್ಯ….. ಅಭಿನಯವೆಲ್ಲಾ ಚೆನ್ನಾಗಿತ್ತು, ಉಮೇಶ್ ಅವರ ಅಜ್ಜಿ ಪಾತ್ರ ನಿಜಕ್ಕೂ ಸೂಪರ್! ಆದರೆ, ಹೆಚ್ಚಿನದು ಮೊದಲು ಕೇಳಿದ್ದ/ನೋಡಿದ್ದ ಹಾಸ್ಯವೇ ಆಪರೇಶನ್ ಮಾಡಿಸಿಕೊಂಡು ಹೊಸ ರೂಪ ತಾಳಿ ಬಂದಾಗ ಕಿರಿಕಿರಿಯಾಯಿತು. ಮೋಟಾರ್ ಬೈಕು ವೇಗವರ್ಧಕ (accelerator) ಇಲ್ಲದೇ ಹೇಗೆ ಓಡ್ತಾ ಇತ್ತು ಎಂದು ನಮಗೆ ಇನ್ನೂ ಯಕ್ಷಪ್ರಶ್ನೆಯಾಗೇ ಉಳಿದಿದೆ! ಏನೇ ಆದರೂ, ರಮೇಶ್ ಅವರ ಪ್ರಯತ್ನವನ್ನು ಅಲ್ಲಗೆಳೆಯುವಂತಿಲ್ಲ. ಸ್ವಲ್ಪ ಹಾಸ್ಯದ ಹಾಗೂ ಕ್ಲೈಮಾಕ್ಸ್ ಕಡೆಗೆ ಹೆಚ್ಚು ಧ್ಯಾನ ವಹಿಸಿದ್ದರೆ, ಚಿತ್ರ ಇನ್ನೂ ಚೆನ್ನಾಗಿ ಮೂಡಿ ಬರುತ್ತಿತ್ತು. ಕ್ಲಾಸ್ನಲ್ಲಿ ಕಾಪಿ ಹೊಡೆಯೋ ದೃಶ್ಯ ಮಾತ್ರ ನಮ್ಮನ್ನು ತುಂಬಾ ನಗಿಸಿತ್ತು! ಸಂಭಾಷಣೆಗಳೂ ಚೆನ್ನಾಗಿದ್ದವು. ಆದರೆ, ಹೊಗಳಲಾರ್ಹ ವಿಷಯವೇನೆಂದರೆ, ರಮೇಶ್ ಅವರು ತುಂಬಾ ನವ ಪ್ರತಿಭೆಗಳನ್ನು ಈ ಚಿತದ ಮೂಲಕ ತೆರೆಗೆ ತಂದಿದ್ದು. ಪಲ್ಟಿ ಹೊಡೆಯೋ ಅವಳಿ ಹುಡುಗರು, ಹಾಗೂ ನಾವು ಚಿತ್ರ ಈ ಚಿತ್ರ ನೋಡಲು ಮುಖ್ಯ ಕಾರಣ… ದೇವದಾಸ್ ಕಾಪಿಕಾಡ್! ಟೈಟಲ್ನಲ್ಲಿ ಇವರನ್ನು ಹೊಸಾ ಪ್ರತಿಭೆಯೆಂದು ತೋರಿಸಿದ್ದರೂ, ಇವರು ನಮಗೆ ಹೊಸಾ ಪ್ರತಿಭೆಯೇನೂ ಅಲ್ಲ. ಉಡುಪಿ-ಮಂಗಳೂರಲ್ಲಿ ಯಾರ ಬೇಕಾದರೂ ಕೇಳಿ, “ಭಲೇ ಚಾ ಪರ್ಕ”ದ ಕಾಪಿಕಾಡರು ಯಾರೆಂದು ಹೇಳುತ್ತಾರೆ. ತುಳು ನಾಟಕದ ದೊಡ್ಡ ಹೆಸರು, “ದೇವದಾಸ್ ಕಾಪಿಕಾಡ್”! ಇವರು ನಟಿಸಿರುವ ಮೊದಲ ಕನ್ನಡ ಚಿತ್ರ ನೋಡಲೆಂದೇ ಎಲ್ರೂ ಸೆಂಟ್ರಲ್ಗೆ ಮುಗಿಬೀಳುತ್ತಿದ್ದರು (ನಾವೂ ಸೇರಿದಂತೆ..) ಮಂಗಳೂರಿನ ಸೆಂಟ್ರಲ್ ಚಿತ್ರಮಂದಿರದ “ವೆಂಕಟ..” ಭಿತ್ತಿಪತ್ರಗಳ (ಪೋಸ್ಟರ್ ಗಳ) ನೋಡಿದ್ರೆ, ದೇವದಾಸ್ ಕಾಪಿಕಾಡರೇ ಹೀರೋ ಅಂದ್ಕೋಬೇಕು ನಾವು! ಅದರ ತುಂಬಾ ಅವರದ್ದೇ ಪೋಸುಗಳು! ಚಿತ್ರದಲ್ಲಿ ಅವರೇ ಮುಖ್ಯ ಹಾಸ್ಯಗಾರ, ನಗಿಸುವಲ್ಲಿ ಯಶಸ್ವಿಯಾಗಿದ್ದರೆಯೆನ್ನುವ ಅಗತ್ಯವೇ ಇಲ್ಲ. ಕಾಪಿಕಾಡರು ಇದ್ದಾರೆಂದರೆ, ನಗಲು ಇದೆಯೆಂದು ಪ್ರತ್ಯೇಕವಾಗಿ ಹೇಳಬೇಕಾಗಿಲ್ಲ! ಆದರೂ, “ವೆಂಕಟ”ನು “ಸಂಕಟ” ನೀಡಿದನು.. ಚಿತ್ರ ಹೆಚ್ಚು ಖುಷಿಕೊಡಲಿಲ್ಲ… ಕೆಲವು ಹಾಸ್ಯ ದೃಶ್ಯಗಳ ಹೊರತುಪಡಿಸಿ…

ಜಂಗ್ಲಿ

   ನಮ್ಮ ತಲೆಗೆ ಕಳೆದು ಹೋದ ಚೇತನವನ್ನು ತರಿಸಲೆಂದು ಹೋಟೇಲಿಗೆ ಹೋದೆವು. ಚಹಾ ಹೀರುತ್ತಾ ಗೆಳೆಯ ಹೇಳಿದ, “ಜಂಗ್ಲಿ” ನೋಡುವ ಮಾರೆ.. ಒಳ್ಳೆ ಉಂಟು..” ಮತ್ತೆ “ದೂಸ್ರಾ ಮಾತಿಲ್ಲ”! ಸೀದಾ ಹೊರಟೆವು, ರಾಮಕಾಂತಿ ಚಿತ್ರಮಂದಿರಕ್ಕೆ. ವಿಶೇಷವೇನೆಂದರೆ, ಅಲ್ಲಿ ಹಿಂದೆ ಯಾವ ಚಿತ್ರಕ್ಕೆ ಹೋಗಿದ್ದೆ ಅನ್ನೋದೇ ನೆನಪಿಲ್ಲ! ಮಿತ್ರನು ಅಲ್ಲಿ “ಜೋಗಿ” ನೋಡಿದ್ದ. ಅಲ್ಲಿ ತುಂಬಾ ವರ್ಷಗಳ ಹಿಂದೆ “ಮೈನೆ ಪ್ಯಾರ್ ಕಿಯಾ” ನೋಡಿದ್ದ ನೆನಪು… ಮತ್ತೆ ಹೋಗಿದ್ದೆನು, ಆದ್ರೆ, ಚಿತ್ರ ಯಾವುದೆಂದು ಹೊಳೀತಿಲ್ಲ. ಬಿಡಿ, ಯಾಕೆ ಹಳೇ ಮಾತು… ಜಂಗ್ಲಿ ನೋಡಿ ಖುಷಿಯಾಯ್ತು! ಒಂಥರಾ ಭಿನ್ನ ಶೈಲಿಯಲ್ಲಿತ್ತು ಅದರ ಚಿತ್ರಕಥೆ, screenplay. ಛಾಯಾಗ್ರಹಣವಂತೂ ಸೂಪರ್! ಶುರುವಿನಿಂದ ಕಡೆಯವರೆಗೂ! ಕೆ.ಆರ್.ಪುರಮ್ ಕೇಬಲ್ ಸೇತುವೆಯ ಬಳಿ ಶುರುವಾದ “ಜಂಗ್ಲಿ” ಕೊನೆಯವರೆಗೂ ನೋಡಿಸಿಕೊಂಡು ಹೋಯಿತು. ಎಲ್ಲೂ “ಬೋರ್” ಆಗ್ಲಿಲ್ಲ. ಸೊಗಸಾದ ಹಾಡುಗಳು, (ಕಂಗ್ಲಿಷ್ ಆದ್ರೂ ಚೆನ್ನಾಗಿತ್ತು!) ಇನ್ನೂ ಸೊಗಸಾದ ಚಿತ್ರೀಕರಣ, ಛಾಯಾಗ್ರಹಣ… ಉಳಿದ ತಾಂತ್ರಿಕತೆಗಳು! ರಾಮಕಾಂತಿಯ ದೊಡ್ಡ, ಅಗಲ ಪರದೆಯಮೇಲೆ, ಸುತ್ತುವರಿ ಧ್ವನಿ ವಿಶೇಷಗಳ ನಡುವೆ “ಜಂಗ್ಲಿ” ಮಿಂಚಿತು. ಕಥೆಯೇನೂ ವಿಶೇಷವಿಲ್ಲದಿದ್ದರೂ, ಅದನ್ನು ಸಾಗಿಸಿದ ರೀತಿ ಖುಷಿ ತಂದಿತು. ಎಲ್ಲರ ಅಭಿನಯವೂ ಚೆನ್ನಾಗಿತ್ತು. ವಿಶೇಷವಾಗಿ, ರಂಗಾಯಣ ರಘು-ವಿಜಯ್ ಅವರದು. ಹೆಚ್ಚೇನೂ ಇಲ್ಲ ಚಿತ್ರದಲ್ಲಿ, ಮಸಾಲಾ ಮನೋರಂಜನೆ. ಆದರೆ, ಒಮ್ಮೆ ನೋಡಿ ಆನಂದಿಸಬಹುದು…

    ಚಿತ್ರಗಳ ಕಥೆ ಹೇಳಿ ಮೋಜು ಹಾಳು ಮಾಡಲು ಹೋಗಲ್ಲ! ನೀವೇ ನೋಡಿ. ನಮಗಿಷ್ಟವಾದುದು ನಿಮಗೆ ಆಗದೆಯೂ ಇರಬಹುದು. ಇಷ್ಟವಾಗದು ನಿಮಗೆ ಇಷ್ಟವಾಗಲೂ ಬಹುದು… ಅಂದ ಹಾಗೆ, ಸಂಜೆ ಷೋ, “ಸಂಕಟ”ವಾಗಿ, ರಾತ್ರಿ ಷೋ “ಜಂಗ್ಲಿ”ಯಾಯ್ತು. ಮೂರನೇ ಚಿತ್ರ ಅಂದೇ ನೋಡಿ ನಮ್ಮ ದಾಖಲೆ ಮುರಿಯಲಾಗಲಿಲ್ಲ…

ಪ್ರಲೇಖ(Pralekha)
©2009 Pradeep Features. All rights reserved.

ನಮಸ್ಕಾರ “ಕನ್ನಡಿಗರೇ”!! (ಅಥವಾ ಕಂಗ್ಲೀಷ್ ಬಾಂಧವರೇ!).. ಎಷ್ಟು ಸಲ ಅನ್ನಕ್ಕೆ rice ಅಂದಿದ್ದೀರಿ? ಊಟಕ್ಕೆ meals ಅಂದಿದ್ದೀರಿ? ಮನೆಗೆ home ಅಂದಿದ್ದೀರಿ? ಅಮ್ಮನಿಗ mummy, ಅಪ್ಪನಿಗೆ daddy ಅಂದಿದ್ದೀರಿ? ಎಷ್ಟು ಬಾರಿ ಕನ್ನಡದ ಅಂದವನ್ನು ಈ ರೀತಿ ಕೆಡಿಸಿದ್ದೀರಿ?? ತಿಳಿದೋ-ತಿಳಿಯದೋ ಕನ್ನಡದ ಇಂಪನ್ನು ಮೂಲೆಗುಂಪನ್ನಾಗಿ ಮಾಡಿದ್ದೀರಿ??

ಕನ್ನಡದ ಬೆಳವಣಿಗೆ(evolution)::
ಪುರಾತನ ಕಾಲ :: ಹಳೆಗನ್ನಡ
ಮಧ್ಯಮ ಕಾಲ :: ಹೊಸಗನ್ನಡ
ಈಗಿನ ಕಾಲ :: ಹಾಳುಗನ್ನಡ (ಇದರ ಒಂದು ರೂಪ (“version”), ಕಂಗ್ಲಿಷ್(“kanglish”)
“ನನಗೆ white rice, ಅವ್ರಿಗೆ boiled rice”, “ಬೆಳಿಗ್ಗೆ tiffin ಆಯ್ತಾ?”, “ನಾಳೆ evening ಸಿಗೋಣ”, “ನಾಡಿದ್ದು morning ಬರ್ತೇನೆ”, “reach ಆಗುವಾಗ 9′o clock ಆಗ್ಬಹುದು”, “ಇವ್ರು ನನ್ನ brother”……….

ಸಾಕೆ? ಇನ್ನೂ “examples” ಬೇಕೆ? (“ಉದಾಹರಣೆಗಳು” ಎಂದರೆ ಕೆಲವರಿಗೆ ಅರ್ಥವಾಗದೆ ಇರಬಹುದು)
ಯಾಕೆ “smile” ಮಾಡ್ತಾ ಇದ್ದೀರಿ? ನೀವೇ ಸಹಸ್ರಾರು ಬಾರಿ, ಈ ರೀತಿ ಕನ್ನಡದ ಕಗ್ಗೊಲೆ ಮಾಡಿರುವಿರಿ.. “ಓಹೋ! ಇವನೇನು, ಮಹಾ ಕನ್ಡಡ ಪ್ರೇಮಿ!” ಎಂದು ಯೋಚಿಸ್ತಿದ್ದೀರಾ.. ನಾನೇನು ಶುದ್ದ ಕನ್ನಡ ಬಲ್ಲವನಲ್ಲ. ನನ್ನ ಭಾಷೆಯಲ್ಲಿ ಹಲವಾರು ವ್ಯಾಕರಣ ದೋಷಗಳನ್ನು (gramattical errors) ಯಾರೂ(ಅಂದ್ರೆ, ವ್ಯಾಕರಣ ಬಲ್ಲವರು) ಬಹಳ ಕಷ್ಟವಿಲ್ಲದೇ ಕಂಡುಹಿಡಿಯಬಹುದು. Bus ಅನ್ನು ಧೂಮಶಕಟ ವಾಹನವೆಂದು ಕರೆಯುವ ಬದಲು ಬಸ್ಸು (bus) ಎಂದರೇ ಸುಲಭ, computer ಅನ್ನು ಗಣಕ ಯಂತ್ರ, t.v ಯನ್ನು ದೂರದರ್ಶಕ ಯಂತ್ರ, ಹಾಗೂ ಈ ರೀತಿಯ ಇನ್ನಿತರೆ ಬಲು ಕ್ಷಿಪ್ಲಕರವಾದ ಪದಗಳನ್ನು ಅದರ ಅಂಗ್ಲ ರೂಪದಲ್ಲಿ ಬಳಸಿದರೇ ಚೆನ್ನ. ಆದ್ರೆ, ಅನ್ನ, ತಿಂಡಿ, ಸಂಜೆ, ಬೆಳಿಗ್ಗೆ, ಅಣ್ಣ… ಮುಂತಾದ ಸುಲಭ ಪದಗಳನ್ನು ಬಳಸುವ ಬದಲು, rice, tiffin, evening, morning, ಎಂದೆಲ್ಲಾ ಮಾತನಾಡುವಾಗ ಬಳಸುವುದು ಯಾವ ರೀತಿಯಲ್ಲಿ ಹೆಚ್ಚು ಅನುಕೂಲಕರ(convenient)?? ನೀವಿದನ್ನು ನಿಮಗೆ ತಿಳಿಯದೆಯೇ ಬಳಸುತ್ತಿರಬಹುದು, ತಿಳಿದೇ ಬಳಸುತ್ತಿರಬಹುದು. ಆದರೆ, ಇದು ಕನ್ನಡದ ಅಂದವನ್ನು, ಕನ್ನಡದ ಕಂಪನ್ನು ಹಾಳುಗೆಡವುತ್ತಿದೆ. ನಿಮಗೆ ಆಂಗ್ಲ ವ್ಯಾಮೋಹವು ಅಷ್ಟು ಹೆಚ್ಚಾಗಿದ್ದರೆ, ಅದನ್ನೇ ಬಳಸಿ. ಸಂಪೂರ್ಣ ಆಂಗ್ಲದಲ್ಲಿಯೇ ಮಾತನಾಡಿ, ವ್ಯವಹರಿಸಿ. ಸುಮ್ಮನೇ ಸವಿಗನ್ನಡವನ್ನು ಹಾಳುಗನ್ನಡವನ್ನೇಕೆ ಮಾಡುತ್ತೀರಿ?

ನಾನು ಕೇವಲ ಆಂಗ್ಲ ಮಾಧ್ಯಮದಲ್ಲಿ ಕಲಿತವರ ಬಗ್ಗೆ ಹೇಳುತ್ತಿಲ್ಲ. (ನಾನು ಅಂಗ್ಲ ಮಾಧ್ಯಮದಲ್ಲಿ ಕಲಿತವನೇ). ದುರದೃಷ್ಟದ ಸಂಗತಿಯೇನೆಂದರೆ, ಕನ್ನಡ ಮಾಧ್ಯಮದಲ್ಲಿ ಕಲಿತ ಹಲವರೂ ಈ “ಕಂಗ್ಲಿಷ್” ಬಳಸುತ್ತಿರುವುದು. ಇನ್ನೂ ದುರದೃಷ್ಟದ ಸಂಗತಿಯೇನೆಂದರೆ, ಇವರು ತಮ್ಮ ಮಕ್ಕಳೊಡನೆಯೂ ಕಂಗ್ಲಿಷ್ ನಲ್ಲಿಯೇ ಮಾತನಾಡುತ್ತಾರೆ. ಹಲವು ಮಕ್ಕಳಿಗೆ, “ಸೇಬು ಹಣ್ಣು” ಎಂದರೆ ತಿಳಿಯದು. ಅವ್ರಿಗೆ “apple”  ಎಂದಾಗಲೇ ಗೋಚಾರವಾಗುವುದು. (ಇವುಗಳಿಗೆ ಅಪ್ಪ, ಅಮ್ಮ ಇರುವುದಿಲ್ಲ. ಮಮ್ಮಿ, ಡ್ಯಾಡಿ ಮಾತ್ರ.).. “ಮಾವು”, “ಹಲಸು”, “ಅನಾನಾಸು”, “ಬಾಳೆ”…., “ಈ ಮನುಷ್ಯ ಏನ್ ಹೇಳ್ತಿದ್ದಾನಪ್ಪಾ! ಯಾವೂರಿನಿಂದ ಬಂದನಪ್ಪಾ!”, ಎಂದು ಅಂತಹ ಮಕ್ಕಳು ಆಶ್ಚರ್ಯಪಟ್ಟ್ರೆ, ಅದರಲ್ಲಿ ಆಶ್ಚರ್ಯವೇನಿಲ್ಲ! ಏಕೆಂದರೆ, ಅವುಗಳ ಪೂಜ್ಯ ಮಾತಾಪಿತರು, “ನೋಡು ಪುಟ್ಟಾ! ಅದು “ಮ್ಯಾಂಗೋ”(mango)”, “ಅಲ್ನೋಡ್ ಪುಟ್ಟೀ, “ಜ್ಯಾಕ್ಫ್ರೂಟ್!” (jackfruit), “ಮರೀ! ಅದು ಪೈನ್ಯಾಪಲ್ (pineapple)”, “ಮುದ್ದೂ, “ಬನಾನಾ” (banana) ತಿನ್ನು”…. ಅಂದೆಲ್ಲಾ ಹೇಳಿಕೊಟ್ಟಿರುತ್ತಾರೆ.. ತಾವೂ ಕನ್ನಡ ಕೊಂದು, ಕನ್ನಡದ ಭವಿಷ್ಯವನ್ನೂ ಕೊಲ್ಲುತ್ತಿದ್ದಾರೆ.. ಇದು ನಿಮ್ಮ ಮನೆಯಲ್ಲಿಯೇ ಎಷ್ಟರ ಮಟ್ಟಿಗೆ ನಡೆಯುತ್ತಲಿದೆಯೆಂದು ಒಮ್ಮೆ ಕಣ್ತೆರೆದು ನೀವೇ ಗಮನಿಸಿ.

ಮಗು ತನ್ನ ಮಾತೃಭಾಷೆ ಕಲಿಯುವುದು ಮನೆಯಲ್ಲಿ. ಬೇರೆ ಭಾಷೆ, ಶಾಲೆಯಲ್ಲಿ, ಪ್ರಪಂಚದಲ್ಲಿ. ಕನ್ನಡದ ಕಗ್ಗೊಲೆಯಾಗುತ್ತಿರುವುದು ಶಾಲೆಯಲ್ಲಲ್ಲ, ಕನ್ನಡ ನಾಡಿನಲ್ಲಲ್ಲ. ಕನ್ನಡಿಗರ ಮನೆ ಮನೆಯಲ್ಲಿ, ಮುಗ್ಧ ಬಾಲ ಕನ್ನಡಿಗರ ಮನದಲ್ಲಿ…

ಸರಕಾರವು ಕನ್ನಡವನ್ನು ಶಾಲೆಯಲ್ಲಲ್ಲ, ಕನ್ನಡ ಉಳಿಸಬೇಕಾಗಿದ್ರೆ ಮನೆ ಮನೆಯಲ್ಲಿ ಕಡ್ಡಾಯ ಮಾಡಬೇಕಾದ ಪರಿಸ್ಥಿತಿ ಇಂದಿದೆ.

ನಮ್ಮ ಕಂಗ್ಲೀಷ್ ಮಿತ್ರರಿಗೆ “ಈಗಾದರೂ ಎಚ್ಚೆತ್ತುಕೊಳ್ಳಿ, ಕನ್ನಡ ಉಳಿಸಿ, ಕನ್ನಡಾಂಬೆಯನ್ನು ಕಾಪಾಡಿ” ಎಂದೆಲ್ಲ ನಾನು ಹೇಳಲು ಹೋಗಿಲ್ಲ, ಹೋಗುವುದೂ ಇಲ್ಲ. ಏಕೆಂದರೆ, ಮೂರ್ಖರನ್ನು ತಿದ್ದುವುದು ಅಸಾಧ್ಯವೆಂದು ಸರ್ವಜ್ಞನು ಎಂದೋ ಹೇಳಿದ್ದಾನೆ.
ಹೇಳುವುದು ಇಷ್ಟೇ, ಎರಡೇ ಮಾತು:
೧::ಕನ್ನಡ ಬೇಕೆಂದರೆ, ಕನ್ನಡದಲ್ಲಿಯೇ ಮಾತನಾಡಿ. (ಶುಧ್ದ, ಪರಿಶುಧ್ದ ಕನ್ನಡವಲ್ಲ ಸ್ವಾಮಿ! ಸರಳ, ಸಾಮಾನ್ಯ ಕನ್ನಡವಾಗಿದ್ದರೂ ಧಾರಾಳವಾಗಿ ಸಾಕು!) ಕಂಗ್ಲಿಶ್ ಬಿಸಾಕಿ.
೨:: ಇಲ್ಲವಾದರೆ, ನಿಮಗೆ ಅಂಗ್ಲ ವ್ಯಾಮೋಹವೇ ಜಾಸ್ತಿಯೆಂದರೆ, ಕನ್ನಡ (ನಿಮ್ಮದ್ಯಾವ ಕನ್ನಡ ಸ್ವಾಮೀ, ಅದು “ಕಂಗ್ಲಿಷು”) ಬಿಟ್ಟುಹಾಕಿ! ನಿಮ್ಮ ಹಾಳುಗನ್ನಡ ನಿಲ್ಲಿಸಿ! ಆಂಗ್ಲದಲ್ಲಿಯೇ ಸಂಪೂರ್ಣವಾಗಿ ಮಾತನ್ನಾಡಿ.
ಯಾವುದೇ ಕೋರಿಕೆಯಿಲ್ಲ, ಒತ್ತಾಯವಿಲ್ಲ. ಎರಡು ಆಯ್ಕೆಗಳು(options) ನಿಮ್ಮ ಮುಂದೆ ಇದೆ. ನಿಮಗೆ ಸೂಕ್ತವೆನಿಸಿದ ಆಯ್ಕೆ ನೀವೇ ಮಾಡಿಕೊಳ್ಳಿ.
ಏಕೆಂದ್ರೆ, ಚಂದದ, ಸೊಬಗಿನ ಯಾವುದನ್ನೂ ಅರೆಜೀವ ಮಾಡಿ, ವಿಕಾರಗೊಳಿಸಿ, ಹೇಸಿಗೆಗೋಳಿಸಿ ಬದುಕುಳಿಸುವುದಕ್ಕಿಂತ, ಅದನ್ನು ಕೊಲ್ಲುವುದೇ ಮೇಲು.. ಅಲ್ಲವೇ..

»ಪ್ರಲೇಖ

ನಿಮ್ಮ ಕನ್ನಡ ಎಷ್ಟು ಗುಣಮಟ್ಟದ್ದು? ಅದು ಎಷ್ಟರ ಮಟ್ಟಿಗೆ ಕಲಬೆರಕೆಯಾಗಿದೆಯೆಂದು ತಿಳಿಯಬೇಕೆ?
ಇಲ್ಲಿದೆ ನಿಮ್ಮ ಭಾಷಾ ಕಲಬೆರಕೆಯನ್ನು ಅಳೆಯಲೊಂದು ಸೂತ್ರ!

©Copyright Pradeep Features. All rights reserved.

:: General Formula To Measure The Language Adulteration ::
Language Adulteration (per sentence)
= (The number of foreign language words in the sentence) / (Total number of words in that sentence)

Language Adulteration Percentage(per sentence)
= [ (The number of foreign language words in the sentence) / (Total number of words in that sentence) ] X 100  %

»ಪ್ರಲೇಖ

©Copyright Pradeep Features. All rights reserved.