ಚಿತ್ರ – ಸಮಯದ ಒಂದು ತುಣುಕು

ಚಿತ್ರ - ಸಮಯದ ಒಂದು ತುಣುಕು

ಚಿತ್ರ - ಸಮಯದ ಒಂದು ತುಣುಕು

ಚಿತ್ರವೊಂದು ಸಾವಿರ ಮಾತುಗಳನ್ನಾಡುವುದೆಂದು ಹೇಳುತ್ತಾರೆ. ಆದರೆ ಚಿತ್ರವೊಂದು ಅದಕ್ಕಿಂತ ಮಿಗಿಲಾಗಿದೆ. ಹೇಗೆ ಸಂಗೀತಕ್ಕೆ ಮನ ತಣಿಸುವ ಶಕ್ತಿಯಿದೆಯೋ, ಅದೇ ರೀತಿ ಚಿತ್ರಗಳೂ ಸಹ. ಚಿತ್ರಗಳು ಸಮಯದ ಒಂದು ತುಣುಕು. ನಾವು ಎಂದೆಂದಿಗೂ ಆನಂದಿಸಬಹುದಾದ ಘಳಿಗೆಯ ಒಂದು ನೋಟ.

ಚಿತ್ರದಲ್ಲಿರುವ ವ್ಯಕ್ತಿ, ದೃಷ್ಯ, ಅಥವಾ ಯಾವುದೇ ಒಂದು ವಸ್ತು ನಿಜ ಜೀವನದಲ್ಲಿ ಬದಲಾಗಬಹುದು, ಇನ್ನಿಲ್ಲದೆಯೂ ಇರಬಹುದು. ಆದರೆ ಆ ವಸ್ತುವು ತನ್ನ ಚಿತ್ರದಲ್ಲಿ ಅದನ್ನು ತೆಗೆದ ಘಳಿಗೆಯಲ್ಲಿದ್ದಂತೆ ಎಂದೆಂದಿಗೂ ಶಾಶ್ವತವಾಗಿ ಕಂಗೊಳಿಸುವಿದು. ಚಿತ್ರದಲ್ಲಿರುವ ದೃಷ್ಯಕ್ಕೆ ಆ ಚಿತ್ರವಿರುವವರೆಗೂ ಸಾವಿಲ್ಲ.

ಚಟ್ಟಿಯಲ್ಲಿ ನಿದ್ರಿಸುತ್ತಿರುವ ನಮ್ಮ ಬೆಕ್ಕು

ಚಟ್ಟಿಯಲ್ಲಿ ನಿದ್ರಿಸುತ್ತಿರುವ ನಮ್ಮ ಬೆಕ್ಕು

ಒಂದು ಒಳ್ಳೆಯ ಚಿತ್ರವು ಒಳ್ಳೆಯ ಸಂಗೀತದಂತೆ ಮನಸ್ಸಿಗೆ ಆನಂದವನ್ನೂ, ಸಂತಸವನ್ನೂ ತರುವುದು. ಓಂದು ರೀತಿಯಲ್ಲಿ, ಚಿತ್ರಗಳು ಕಂಗಳಿಗೆ ಸಂಗೀತವೆಂದರೆ ತಪ್ಪಾಗಲಾರದು. ತಿಂಗಳು, ವರ್ಷಗಳ ನಂತರ ಒಂದು ಚಿತ್ರವನ್ನು ನೋಡಿದಾಕ್ಷಣ ಕಳೆದು ಹೋದ ಕ್ಷಣಗಳ ನೆನಪು ತರುವುದು ಹಾಗೂ ಸಂತಸ ಕೊಡುವುದು. ಆ ಚಿತ್ರದಲ್ಲಿ ನಿಮ್ಮ ಆಪ್ತರೇ ಇರಬಹುದು, ನೀವೇ ಇರಬಹುದು ಅಥವಾ ಜಾತ್ರೆಯೊಂದರ ಜನಜಂಗುಳಿಯೇ ಇರಬಹುದು. ಆ ಚಿತ್ರವು ನಿಮ್ಮ ಮನಸನ್ನು  ಅದನ್ನು ಸೆರೆಹಿಡಿದ ಕ್ಷಣಕ್ಕೊಯ್ದು, ಸಂಬಂಧಪಟ್ಟ ವಿಷಯಗಳ ನೆನಪಿನ ಕಲೆತವನ್ನು ತೆರೆದಿಡುವುದೆಂದರೆ ತಪ್ಪಾಗದು. ಯಾರೂ ಇಲ್ಲದಿರುವ ಒಂದು ಸಂಜೆಯ ಬರೀ ನಿಸರ್ಗದ ಚಿತ್ರವೂ ಅದನ್ನು ನೋಡಿದಾಕ್ಷಣ, ನಿಸರ್ಗವು ಕರುಣಿಸಿದ ಆ ಸಂಜೆಯ ವೈಭವವನ್ನು, ಆನಂದವನ್ನು ಮತ್ತೆ ತರುವುದು.

ನೀವು ಸೆರೆಹಿಡಿದ ನಿಮ್ಮ ಕ್ಷಣಗಳ ಚಿತ್ರಗಳು, ಹಾಗೂ ಸುಮ್ಮನೆ ಮೋಜಿಗೆ ತೆಗೆದ ಚಿತ್ರಗಳನ್ನು ನೀವು ಮಾತ್ರವಲ್ಲದೆ ಮುಂದಿನ ಪೀಳಿಗೆಯೂ ಆನಂದಿಸುವರು.

ಪ್ರಲೇಖ
ನನ್ನ ಚಿತ್ರಗಳನ್ನು ನೋಡಲು ಪ್ರಚಿತ್ರಕ್ಕೆ ಭೇಟಿ ನೀಡಿ.

ಚಿತ್ರ ಕೃಪೆ:
Camera_Icon.png By Mazenl77 (FindIcons) [CC-BY-3.0-2.5-2.0-1.0], via Wikimedia Commons
Advertisements

ರೈಲು ವಿಸ್ತರಣೆ : ಮಂಗಳೂರಿನ ರೈಲು ಪ್ರಸಂಗ

ಮಂಗಳೂರಿನ ರೈಲು ಪ್ರಸಂಗ

ರೈಲು ವಿಸ್ತರಣೆ


ಮಂಗಳೂರು-ಮುಂಬೈ ನಡುವಿನ ಮಂಗಳೂರು ಜಂಕ್ಷನ್-ಛತ್ರಪತಿ ಶಿವಾಜಿ ಟರ್ಮಿನಸ್(CST) ರೈಲು ಈಗ “ಮುಂಬೈ ಎಕ್ಸ್ ಪ್ರೆಸ್” (12133/34) ಎಂದು ಮರುನಾಮಕರಣಗೊಂಡಿದೆ. ಉದಯವಾಣಿಯ ವರದಿಯ ಪ್ರಕಾರ, ಇದರ ಹಿಂದೆ ಈ ರೈಲನ್ನು ಎರ್ನಾಕುಲಂಗೆ ವಿಸ್ತರಿಸುವ ಹುನ್ನಾರ ಕಂಡುಬಂದಿದೆ [೧]. ಬಹುಜನರ ಬೇಡಿಕೆಯ ಮೇರೆಗೆ ಪ್ರಾರಂಭಿಸಿದ್ದ ಈ ಎಕ್ಸ್ ಪ್ರೆಸ್ ರೈಲನ್ನು ಮುಂಬೈನ CST ಹಾಗೂ ಮಂಗಳೂರು ಜಂಕ್ಷನ್ ನಡುವೆ ಮಾತ್ರ ಓಡಿಸುತ್ತಿದ್ದರು. ಇದು ಮಂಗಳೂರು ಸಿಟಿ ಟರ್ಮಿನಲ್ಲಿಗೆ ಹೋಗುತ್ತಿರಲಿಲ್ಲ. ಕೇರಳಕ್ಕೆ ವಿಸ್ತರಿಸುವ ಅಂದಾಜು ಪ್ರಾರಂಭದಿಂದಲೇ ಇತ್ತೆಂದು ತೋರುತ್ತದೆ [೧], ಏಕೆಂದರೆ, ಕೇರಳದ ಕಡೆ ಮಂಗಳೂರಾಗಿ ಹಾದು ಹೋಗುವ ಎಲ್ಲಾ ರೈಲುಗಳು ಮಂಗಳೂರು ಜಂಕ್ಷನ್ ಆಗಿಯೇ ಹೋಗಬೇಕು. ಟರ್ಮಿನಲ್ಲಿಗೆ ಹೋದರೆ ಅಲ್ಲಿ ಎಂಜಿನ್ ದಿಕ್ಕು ಬದಲಿಸಿ ತಿರುಗಿ ಬರಬೇಕು. ಇದಾದಲ್ಲಿ ಇನ್ನೊಂದು ಮಂಗಳೂರಿಗಂತಿದ್ದ ರೈಲು ಕೇರಳಕ್ಕೆ ವಿಸ್ತರಣೆಗೊಳ್ಳುವುದು. ಈ ಹಿಂದೆ ಬೆಂಗಳೂರು-ಮಂಗಳೂರು ನಡುವೆ ಇದ್ದ “ಯಶವಂತಪುರ ಎಕ್ಸ್ ಪ್ರೆಸ್” ಕೇರಳದ ಕಣ್ಣೂರಿಗೆ ವಿಸ್ತರಿಸಲ್ಪಟ್ಟಿತ್ತು.

ಮೀಟರ್ ಗೇಜಿನಿಂದ ಬ್ರಾಡ್ ಗೇಜಿನ ಪರಿವರ್ತನೆಗೆ ಹತ್ತು ವರುಷಗಳೇ ಬೇಕಾದವು. ಅದರಲ್ಲಿ ಸಕಲೇಷಪುರ-ಮಂಗಳೂರು ಜಂಕ್ಷನ್ನಿನ ಕಾಮಗಾರಿಗೇ ಹೆಚ್ಚು ವರುಷಗಳು ಬೇಕಾದವು. ೧೯೭೯ರಲ್ಲೇ ಶುರುವಾದ ಮೀಟರ್ ಗೇಜ್ ಕಾಲದಲ್ಲಿ ಮಂಗಳೂರಿಂದ ಬೆಂಗಳೂರಿಗೆ, ನನಗೆ ನೆನಪಿದ್ದಂತೆ ಮೂರು ರೈಲುಗಳಾದರೂ ಇದ್ದವು. ನವೆಂಬರ್ ೨೦೦೫ರಲ್ಲಿ ಮುಗಿದ ಗೇಜ್ ಪರಿವರ್ತನೆ ಕಾರ್ಯದ ಬಳಿಕ ಗೂಡ್ಸ್ ರೈಲುಗಳು ಓಡಾಡುತ್ತಿದವು. ಇದಾಗಿ ಎರಡು ವರುಷದ ವರೆಗೆ ನೆಪಗಳನ್ನೋಡ್ಡಿದ ಬಳಿಕ, ರೈಲ್ವೇಯವರು ಅಂತೂ ಡಿಸೆಂಬರ್ ೨೦೦೭ರಲ್ಲಿ ಯಶವಂತಪುರ-ಬೆಂಗಳೂರು ರೈಲನ್ನು (ಯಶವಂತಪುರ ಎಕ್ಸ್ ಪ್ರೆಸ್) ಪ್ರಾರಂಭಿಸಿದರು. ಪ್ರತಿ ರಾತ್ರಿ ಮಂಗಳೂರು ಹಾಗೂ ಬೆಂಗಳೂರಿನಿಂದಿದ್ದ ಈ ರೈಲು ಮೈಸೂರು ಮಾರ್ಗವಾಗಿ ಹೋಗುತ್ತಿತ್ತು (~೧೨ ತಾಸಿನ ಪ್ರಯಾಣ). ಮೊದಲಿನ ಮೀಟರ್ ಗೇಜ್ ಬೆಂಗಳೂರು ರೈಲು ತುಮಕೂರು-ಅರಸೀಕೆರೆ ಮೇಲೆ ಓಡುತ್ತಿತ್ತು (~೧೦ ತಾಸಿನ ಪ್ರಯಾಣ). ಆದರೆ, ಡಿಸೆಂಬರ್ ೨೦೦೯ರಲ್ಲಿ ಹತ್ತು ವರುಷ ತಾಳ್ಮೆಯಿಂದ ಕಾದ ಮಂಗಳೂರಿಗೆ ಪ್ರಾರಂಭವಾಗಿ ಎರಡೇ ವರುಷದಲ್ಲಿ ಈ ರೈಲು ಕೇರಳದ ಕಣ್ಣೂರಿಗೆ ವಿಸ್ತರಣೆಯಾಗುವ ಉಡುಗೊರೆ ದೊರಕಿತು. ಎರಡು ತಿಂಗಳ ಹಿಂದೆ, ಎರಡು ದಿನಕ್ಕೊಮ್ಮೆ ವಾರಕ್ಕೆ ಮೂರು ಸಲ ಓಡುವ ಹಗಲು ರೈಲು ಜನರ ಒತ್ತಾಯದ ಮೇರೆಗೆ ಕಾರವಾರಕ್ಕೆ ಇತ್ತೀಚೆಗೆ (ಪುಣ್ಯಕ್ಕೆ ನಮ್ಮ ಕರಾವಳಿಗೇ) ವಿಸ್ತರಣೆಗೊಂಡಿದೆ[೨]. ಈ ರೈಲು ತುಮಕೂರು-ಅರಸೀಕೆರೆ ಮಾರ್ಗವಾಗಿ ಓಡುವುದು. ಮಂಗಳೂರಿನಿಂದ ಬೆಂಗಳೂರಿನೆಡೆಗೆ ಓಡುವುದು ಸಧ್ಯಕ್ಕೆ ಈ ಎರಡೇ ರೈಲುಗಳು.

ಕರ್ನಾಟಕದ ಬಂದರು ನಗರಿ ಮಂಗಳೂರು ತನ್ನ ರಾಜ್ಯದ ರಾಜಧಾನಿಗೆ ರೈಲಿನ ಮೂಲಕ ಈ ಬಗೆಯ ಸಂಪರ್ಕವಿರುವುದು ವಿಪರ್ಯಾಸ. ಈ ಎರಡು ನಗರಗಳ ನಡುವಿನ ಜನಸಂಚಾರ ಹೆಚ್ಚಿಗೆ ಇದ್ದು, ರೈಲ್ವೇಯವರಿಗೆ ಸರಿಯಾದ ರೈಲು ಸಂಪರ್ಕ ಸಾಧಿಸಿದಲ್ಲಿ ನಷ್ಟವಲ್ಲ, ಲಾಭವೇ. ಆದರೂ ಹಾಗೆ ಯಾಕಾಗುತ್ತಿಲ್ಲವೆಂಬುದೇ ಯಕ್ಷ ಪ್ರಶ್ನೆಯಾಗಿದೆ. ಇನ್ನೊಂದು ವಿಪರ್ಯಾಸವೇನೆಂದರೆ, ಮಂಗಳೂರಿನಿಂದ ಚೆನ್ನೈಗೆ ಇರುವ “ಚೆನ್ನೈ ಮೇಲ್” ಈಗಲೂ ಕೇರಳವಾಗಿ ತಮಿಳು ನಾಡಿನ ಕೊಯಮುತ್ತೂರಿನ ಮೂಲಕ ತುಂಬಾ ಸುತ್ತಾಗಿ ಹಾದು ಹೋಗುವುದು. ಈ ದಾರಿಯಲ್ಲಿ ರೈಲಿನಲ್ಲಿ ಚೆನ್ನೈಗೆ ಹೋದರೆ ಮಂಗಳೂರಿಂದ ಮುಂಬೈಗೆ ಹೋದಕ್ಕಿಂತ ಹೆಚ್ಚು ಹೊತ್ತು ಬೇಕಾಗುವುದು! [೩] [ಈ ಸ್ವಾರಸ್ಯಕರ ಬ್ಲಾಗ್ ಪೋಸ್ಟ್ ನೋಡಿ. ಆಂಗ್ಲ ಭಾಷೆಯಲ್ಲಿದೆ.] ಮಂಗಳೂರಿಂದ ಚೆನ್ನೈಗೆ ಹೋಗಲು ಈ ರೈಲಿನ ಪ್ರಯೋಜನವಾದರೂ ಏನು? ಇದರಿಂದ ಯಾರಿಗೆ ನಿಜವಾದ ಪ್ರಯೋಜನವೆಂದು ಬಿಡಿಸಿ ಹೇಳಬೇಕಾಗಿಲ್ಲ ತಾನೆ. ಈ ರೈಲು ಈಗ ಬೆಂಗಳೂರಾಗಿ ಓಡಿದರೆ ಅರ್ಥವಿರುತ್ತದೆ. ಆದರೆ, ಒಂದು ಪಕ್ಷ ಹಾಗಾದಲ್ಲಿ ಈ ರೈಲೂ ಕೇರಳದ ಯಾವುದೋ ಊರಿಗೆ ವಿಸ್ತರಣೆಗೊಂಡರೆ ಆಶ್ಚರ್ಯವೇನಿಲ್ಲ! ಕರಾವಳಿ ಕರ್ನಾಟಕದಿಂದ ರಾಜ್ಯದ ಇತರ ಭಾಗಗಳಿಗೆ ರೈಲು ಸಂಪರ್ಕ ಇಂದಿಗೂ ಸರಿಯಾಗಿಲ್ಲ. ಕರ್ನಾಟಕದ ರೈಲ್ವೇ ನಕಾಷೆಯ ಹಾಗೂ ವೇಳಾಪಟ್ಟಿಯ ನೋಡಿದರೆ ರಾಜ್ಯದಲ್ಲಿನ ರೈಲಿನ ವ್ಯವಸ್ಥೆ ಹೇಗಿದೆ ಎಂದು ಎಂಥವನಿಗೂ ಗೋಚರಿಸುವುದು. ಮಂಗಳೂರು ಹಾಗೂ ಮಂಗಳೂರು ಜಂಕ್ಷನ್ ರೈಲು ನಿಲ್ದಾಣವು ಈಗಲೂ ದಕ್ಷಿಣ ರೈಲ್ವೆಯ ಪಾಲ್ಘಾಟ್ ವಲಯದಲ್ಲಿದೆ. ಬಹುಕಾಲಿಕ ಆಗ್ರಹದ ಬಳಿಕವೂ ಈ ನಿಲ್ದಾಣಗಳು ದಕ್ಷಿಣ-ಮಧ್ಯ ರೈಲ್ವೆಯ ಮೈಸೂರು ವಲಯಕ್ಕೆ ಹಸ್ತಾಂತರಗೊಂಡಿಲ್ಲ.

ಈಗ ಕೇರಳಕ್ಕೆ ವಿಸ್ತರಣೆಗೊಳ್ಳಬಹುದಾದ “ಮುಂಬೈ ಎಕ್ಸ್ ಪ್ರೆಸ್” ಅನ್ನು ಹೊರತುಪಡಿಸಿ ಮಂಗಳೂರಿನಿಂದಲೇ ಮುಂಬೈಗೆ ಹೊರಡುವ ರೈಲೆಂದರೆ ಮಂಗಳೂರು ಸಿಟಿ ಟರ್ಮಿನಲ್ಲಿನಿಂದ ಹೊರಡುವ “ಮತ್ಸಗಂಧಾ ಎಕ್ಸ್ ಪ್ರೆಸ್” ಮಾತ್ರ. ರಾಜ್ಯದಲ್ಲಿ ರೈಲಿನ ಬಗೆಗೆ ರಾಜ್ಯದ ನಾಯಕರ ದಿವ್ಯ ನಿರ್ಲಕ್ಷ್ಯ ಮುಂದುವರೆಯುತ್ತಾ ಕನ್ನಡ ಕರಾವಳಿಯು ಉತ್ತಮ ರೈಲು ಸೇವೆಯಿಂದ ಇಂದಿಗೂ ವಂಚಿತವಾಗಿದೆ.

ಪ್ರಲೇಖ

ಟಿಪ್ಪಣಿಗಳು:
[೧] ಮಂಗಳೂರು ಜಂಕ್ಷನ್‌ ಎಕ್ಸ್‌ಪ್ರೆಸ್‌ ಈಗ ಮುಂಬಯಿ ಎಕ್ಸ್‌ಪ್ರೆಸ್‌:ಕೇರಳಕ್ಕೆ ವಿಸ್ತರಣೆಗೆ ಪೀಠಿಕೆ : Udayavani | Dec 25, 2011
[೨]The Hindu:Yeshwanthpur-Mangalore express extended to Karwar
[೩] Karthik’s Log : From Mangalore to Chennai

ಚಿತ್ರ ಕೃಪೆ:
[೧] Train-2.jpg is a cropped image derived from 7032 HYB_Jambrung_Indian_Railways.jpg By HarshWCAM3 (IMG_0304Uploaded by oxyman) [CC-BY-SA-2.0], via Wikimedia Commons

ಕಣಜ | ಅಂತರಜಾಲ ಕನ್ನಡ ಜ್ಞಾನಕೋಶ

ಕಣಜ | ಅಂತರಜಾಲ ಕನ್ನಡ ಜ್ಞಾನಕೋಶ

ಕಣಜ | ಅಂತರಜಾಲ ಕನ್ನಡ ಜ್ಞಾನಕೋಶ

ಇತ್ತೀಚೆಗೆ  “ಕಣಜ” ಎಂಬ ಅಂತರ್ಜಾಲ ತಾಣದ ಬಗ್ಗೆ ತಿಳಿದು ಬಂತು. ಇದನ್ನು ನೋಡಲು ಹೋದಾಗ ಇದು ಕರ್ನಾಟಕ ಸರ್ಕಾರದ ಕರ್ನಾಟಕ ಜ್ಞಾನ ಆಯೋಗದ ಯೋಜನೆಯು ರೂಪಿಸಿ, ಇಂಟರ್‌ನ್ಯಾಶನಲ್ ಇನ್‌ಸ್ಟಿಟ್ಯೂಟ್ ಆಫ್ ಇನ್‌ಫಾರ್ಮೇಶನ್ ಟೆಕ್ನಾಲಜಿಯು (ಐಐಐಟಿ-ಬಿ) ಜಾರಿಗೊಳಿಸುತ್ತಿರುವ ಅಂತರಜಾಲ ಕನ್ನಡ ಜ್ಞಾನಕೋಶ ಎಂದು ತಿಳಿದುಬಂತು.

ಕನ್ನಡದಲ್ಲಿ ಇರುವ ಎಲ್ಲ ಬಗೆಯ ಸಾಹಿತ್ಯವನ್ನೂ ಕಲಿಕೆಗಾಗಿ ಸಾರ್ವಜನಿಕರಿಗೆ ನೀಡುವುದು ಈ ಯೋಜನೆಯ ಉದ್ದೇಶವಾಗಿದೆ. ಅಲ್ಲದೇ, ‘ಕಣಜದಲ್ಲಿ ನಾವು-ನೀವೂ ಸಹ ಬರೆಯಬಹುದು . ಕನ್ನಡ ಭಾಷೆಯಲ್ಲಿ ಯಾವುದೇ ಮಾಹಿತಿಗೆ ಏಕೈಕ ಮೂಲವಾಗುವ, ವಿವಿಧ ಸಂಸ್ಥೆ ಮತ್ತು ವ್ಯಕ್ತಿಗಳಿಂದ ಮಾಹಿತಿಗಳನ್ನು ಪಡೆದು ಅವುಗಳನ್ನು ಸಾರ್ವಜನಿಕ ಬಳಕೆಗಾಗಿ ಕನ್ನಡ ಭಾಷೆಯಲ್ಲಿ, ವಿದ್ಯುನ್ಮಾನ ರೂಪದಲ್ಲಿ, ವಿಶ್ವವ್ಯಾಪಿ ಜಾಲತಾಣದಲ್ಲಿ (www.kanaja.in) ಪ್ರಕಟಿಸುವುದು “ಕಣಜ” ದ ಉದ್ದೇಶವಾಗಿದೆ. ಮಾಹಿತಿಗಳು ಆದಷ್ಟೂ ಅಧಿಕೃತವೂ, ಖಚಿತವೂ, ಸಂಪೂರ್ಣವೂ, ಗುಣಮಟ್ಟದ್ದೂ ಆಗಿರುವಂತೆ ತಜ್ಞರ ನೆರವನ್ನು ಪಡೆದು ಎಲ್ಲ ಮಾಹಿತಿಗಳನ್ನೂ ಪರಾಮರ್ಶೆಗೆ ಒಳಪಡಿಸಿಯೇ ಪ್ರಕಟಿಸುವುದು. ಹೆಚ್ಚಿನ ಮಾಹಿತಿಗೆ ಈ ಕೊಂಡಿಯನ್ನು ಒತ್ತಿರಿ ಹಾಗೂ, `ಕಣಜ’ ಜಾಲತಾಣದಲ್ಲಿ ಪ್ರತಿದಿನವೂ ಒಂದು ಹೊಸ ಲೇಖನವು ಪ್ರಕಟವಾಗುವುದು. ವಿವಿಧ ವಿಷಯತಜ್ಞ ಲೇಖಕರು ತಿಂಗಳಿಗೊಮ್ಮೆ ಕನ್ನಡಿಗರ ಅರಿವಿನ ವಿಸ್ತಾರಕ್ಕೆ ನೆರವಾಗುವ ಲೇಖನಗಳನ್ನಿಲ್ಲಿ ಬರೆಯುವರು. ಕನ್ನಡ ಭಾಷೆ, ಸಾಹಿತ್ಯ, ವಿಜ್ಞಾನ, ತಂತ್ರಜ್ಞಾನ, ಕೃಷಿ, ರೈತರ ಅನುಭವ, ಕಲೆ, ಸಂಗೀತವೆಂಬಂತೆ ಹಲವಾರು ಅಂಕಣಗಳಿವೆ. ಕನ್ನಡ/ಆಂಗ್ಲದಲ್ಲಿ ಟೈಪ್ ಮಾಡುವ ಸೌಲಭ್ಯವೂ ಇದೆ (ಕಣಜದ ಪುಟಗಳಲ್ಲಿ ಬಲ ಮೇಲ್ಭಾಗದಲ್ಲಿ ಈ ಸೌಲಭ್ಯ ಕಾಣಿಸುವುದು). ಇದಲ್ಲದೇ, ಉಪಯುಕ್ತಕಾರಿ ಕನ್ನಡ ಶಬ್ದಕೋಶವನ್ನೂ ಹೊಂದಿದೆ.

ಒಂದು ವಿಪರ್ಯಾಸವೇನೆಂದರೆ, “ಕಣಜ” ಶಬ್ದಾರ್ಥದ ಶೋಧನೆಗೆ ಯಾವುದೇ ಫಲಿತಾಂಶ ಒದಗಲಿಲ್ಲ! ಮುಂದಿನ ದಿನಗಳಲ್ಲಿ ಶಬ್ದಕೋಶದ ಅಭಿವೃದ್ಧಿಯಾಗುವುದೆಂದು ಬಯಸುವೆ. ಕನ್ನಡವನ್ನು ಉಳಿಸುವ, ಹಾಗೂ ಅಂತರ್ಜಾಲ ಮಾಧ್ಯಮದ ಮೂಲಕ ಕನ್ನಡವ ಪಸರಿಸುವ ನಿಟ್ಟಿನಲ್ಲಿ ರೂಪಿಸಿದ ಕರ್ನಾಟಕ ಸರ್ಕಾರದ ಕರ್ನಾಟಕ ಜ್ಞಾನ ಆಯೋಗದ ಈ ಯೋಜನೆ ನಿಜಕ್ಕೂ ಸಂತಸದ ಸುದ್ದಿ. ಕನ್ನಡವನ್ನು ಉಳಿಸೋಣ, ಬೆಳೆಸೋಣ.

ನಾಯಿ ಹೆಗಲಿಗೆ, ಮಗು ಬೀದಿಗೆ… (via CAUTIOUSMIND)

ಥೂ.. ಈ ಥರಾ ಮನುಷ್ಯರೂ ಇರ್ತಾರಾ.. ಇವರಿಗೆ ಶತಮಾನದ ಅತಿ ದೊಡ್ಡ ಶ್ವಾನಪ್ರಿಯರೆಂಬ ಬಿರುದು ನೀಡಬೇಕು…

ನಾಯಿ ಹೆಗಲಿಗೆ, ಮಗು ಬೀದಿಗೆ... ಇಂದಿನ ವಿಜಯ ಕರ್ನಾಟಕದಲ್ಲಿ ಪ್ರಕಟವಾಗಿರುವ (ಕೆಪಿಎನ್) ನ ಪೋಟೋ… … Read More

via CAUTIOUSMIND

ದಾರಿಹೋಕನ ರಗಳೆಗಳು:: ಶ್ವಾನಮತ್ತ ನಾಗರೀಕರು

:ದಾರಿಹೋಕನ ರಗಳೆಗಳು::ರಗಳೆ-೨::

ಅರೆರೆ! ಇದೇನಪ್ಪಾ… ಒಮ್ಮೆ ಕೆರೆ ಗಿರೆ ಅಂತ ಏನೆಲ್ಲಾ ಒದರಿ ಹೋದ ದಾರಿಹೋಕ ನಿದ್ದೆಯಿಂದೆದ್ದನೇ ಅಂದುಕೊಂಡಿರಾ… ಹಾಗೇನಿಲ್ಲ. ಇಲ್ಲಿ ನಿದ್ದೆ ಮಾಡೋರು ಬಹಳಷ್ಟು ಮಂದಿ ಇದಾರೆ. ದೊಡ್ಡದಾದ ಊರಲ್ಲಿ ದಾರಿಹೋಕರಿಗೇನು ಕಮ್ಮಿಯೇ? ರಸ್ತೆಗಿಳಿದರೆ ಸಿಗುವರೇ ವಿವಿಧ ಬಗೆಯ ದಾರಿಹೋಕರು. ಆಹಾ! ಎಷ್ಟೊಂದು ವಿಧ! ಇವರಲ್ಲಿ ಒಂದು ವಿಧದ ಬಗ್ಗೆ ಇವತ್ತು ನಿಮ್ಮ ತಲೆ ತಿನ್ನಲು ಬಯಸುತ್ತೇನೆ. ಇವರು ಒಂಥರಾ ಅಂತಸ್ತು ಹುಚ್ಚು (“status craze”) ಇರೋ ವಿಧಕ್ಕೆ ಸೇರುತ್ತಾರೆ ನೋಡಿ. ಇವರಲ್ಲಿ ಕೆಲವರು ಶ್ವಾನ ಪ್ರೇಮಿಗಳೂ ಆಗಿರಬಹುದು. ಆದರೆ ಮೊದಲನೇ ವಿಧವೇ ಹೆಚ್ಚೆನಿಸುತ್ತದೆ. ಈಗಾಗಲೇ ಇದೇನು ರಗಳೆ ಅಂತ ಹೊಳೆದಿರಬೇಕು ನಿಮಗೆ. ಪೀಠಿಕೆ ಸಾಕು. ನೇರವಾಗಿ ವಿಷಯಕ್ಕೆ ಬರೋಣ. (ಕ್ಷಮಿಸಿ, ಅಷ್ಟೊಂದು ನೇರವಾಗಿ ಅಲ್ಲ..)

::ಶ್ವಾನಮತ್ತ ನಾಗರೀಕರು::
ಬೆಂಗಳೂರಿನಲ್ಲಿ ಅಂದು ಧಾರಾಕಾರ ಮಳೆ. ಎಲ್ಲೆಲ್ಲೂ ಉಕ್ಕಿ ಹರಿಯುವ ನೀರು. ಚರಂಡಿಯಲ್ಲಿ ಮಾತ್ರವಲ್ಲ ಸ್ವಾಮಿ, ದಾರಿಯಲ್ಲೂ. ಈ ಮಳೆನೀರು ನೆಲ ಮುಟ್ಟುವಾಗ ಎಷ್ಟು ಶುದ್ಧವಾಗಿರುವುದೋ* (*ವಾಯುಮಂಡಲದಿಂದ ಮಲಿನಗೊಂಡಿರದಿದ್ದಲ್ಲಿ) ನೆಲಕ್ಕಪ್ಪಳಿಸಿದಂತೆಯೇ ನೆಲದ ಎಲ್ಲಾ ಅಂಶಗಳನ್ನೂ ತನ್ನೊಡನೆ ಕರೆದುಕೊಂಡು ಹರಿಯತೊಡಗುತ್ತೆ. ನೀರು ಒಂಥರಾ ನಿಜವಾದ ಜಾತ್ಯಾತೀತವಾದಿ ನೋಡಿ. ಅದಕ್ಕೆ ಭೇದ ಭಾವ ತಿಳಿಯದು… ನೀನು ಮಣ್ಣು, ನೀನು ಮರಳು, ನೀನು ಕಸ, ನೀನು ಕಡ್ಡಿ, ನೀನು ನಾಯಿ ಹೇಲು… ಅಂತೆಲ್ಲಾ ಹೇಳಿ ತನ್ನೊಡನೆ ಕರೆದೊಯ್ಯದೇ ಇರದು. ರಸ್ತೆಯಲ್ಲಿ ನಡೆದಾಡುವಾಗ ಈ ನೀರಲ್ಲಿ ನಮ್ಮ ಪಾದಗಳ/ಪಾದುಕೆಗಳ ಪಾವನ ಮಾಡಿಸದೇ ಹೋಗುವಂತಿಲ್ಲ. ಮಣ್ಣು, ಕಸ, ಕಡ್ಡಿ ಯೆಲ್ಲಾ ಓಕೆ! ಆದರೆ, ನೀರಲ್ಲಿ ಅರ್ಧ ಕರಡಿದ ನಾಯಿ ಹೇಲು ಬೇಕೇ?! ….

ನಿಮ್ಮ ವಾಂತಿ ಮಾಡುವ ಕಾರ್ಯ ಮುಗಿದಲ್ಲಿ ಮುಂದೆ ಓದಿ….

ಇನ್ನೂ ಬಂದಂತನಿಸುತ್ತಿದೆಯೇ? ನೀವು ಶೀಘ್ರ ವಾಂತಿ ಬರುವವರಾದಲ್ಲಿ ಮುಂದೆ ಓದಬೇಡಿ. ಮನಸ್ಸು ಹಗುರಾಗಿಸಲು ಪ್ರಕವಿಯ ವಲಯಕ್ಕೆ ಭೇಟಿ ನೀಡಿ. ಇಲ್ಲವಾದಲ್ಲಿ ಮುಂದುವರೆಸಿ….

ಹೇಲುತ್ತಿರುವ ನಾಯಿ

ಹೇಲುತ್ತಿರುವ ನಾಯಿ

ಹೇಸಿಗೆಯೆನಿಸಿತೇ? ಅನಿಸದೇ ಇರದು. ಇದನ್ನು ಅಕ್ಷರ ರೂಪದಲ್ಲಿ ಓದಿದಾಗಲೇ ಹೀಗಾದಲ್ಲಿ, ಇನ್ನು ಇದನ್ನು ಕಣ್ಣಾರೆ ಕಾಣುವ (ಅದೃಷ್ಟ ನೆಟ್ಟಗಿರದಿದ್ದಲ್ಲಿ ಇದನ್ನು ಮೆಟ್ಟುವ) ನಮ್ಮಂತಹ ದಾರಿಹೋಕರಿಗಾಗುವ ಪಾಡೇನೆಂದು ಅರ್ಥವಾಗಿರಬೇಕು. “ಸ್ವಚ್ಛ ಬೆಂಗಳೂರು” ಎಂದೆಲ್ಲಾ ಗೋಡೆಗಳನ್ನೆಲ್ಲಾ ಅಂದಗೊಳಿಸುತ್ತಿರುವ ಬಿ.ಬಿ.ಎಂ.ಪಿ ಯವರ ಪಾದವಿನ್ನೂ ಈ ನೀರಿನಲ್ಲಿ ಪಾವನವಾದಂತಿಲ್ಲ. ಬಣ್ಣ ಬಣ್ಣದ ಚಿತ್ರ ಬಿಡಿಸಿ ಕಣ್ಣುಗಳನ್ನು ಮೂರ್ಖರನ್ನಗಿಸಬಹುದೇ ಹೊರತು, ಮೂಗನ್ನಲ್ಲ, ಪಾದುಕೆಗಳನ್ನಲ್ಲ. ಯಾಕ್ರೀ, ನಾಯಿ ಹೇಲೊಂದೇ ಪಾವಗೊಳಿಸುತ್ತೆಯೇ ಹರಿವ ನೀರನ್ನು? ಎಲ್ಲೆಂದರೆಲ್ಲಿ ಮಾಡಿದ ಉಚ್ಚಿಯೇನು ನೀರಲ್ಲಿ ಬೆರೆಯದೇ, ಎಂದೆಲ್ಲಾ “ಶ್ವಾನ ಪ್ರಿಯರು” ಈ ಕ್ಷಣವೇ ಸವಾಲೆಸೆಯಲು ಹಲ್ಲು ಮಸೆಯುತ್ತಿರುತ್ತಾರೆ. ಅದು ಬೇರೆ ವಿಷಯ ಬಿಡಿ. ಹಣ ಪಾವತಿಸಿ ಯಾವ ಮುಠ್ಠಾಳ ಉಚ್ಚಿ ಮಾಡುವನು? ಉಚ್ಚಿ ಮಾಡಲೂ ತೆರಿಗೆಯೇ? ಅದರ ಬದಲು, ಉಚಿತ ಮೂತ್ರಾಲಯಗಳ ತೆರೆದರೆ ನಿಜವಾದ ಉಪಕಾರವಾಗುವುದು ನಾಗರೀಕ ಸಮಾಜಕ್ಕೆ. ಇದು ಬೇರೆ ರಗಳೆ ಬಿಡಿ, ಈ ಬಗ್ಗೆ ಮುಂದಿನ ಸಾರಿ ತಲೆ ತಿನ್ನೋಣ. ಸಧ್ಯ ನಾಯಿ ಹೇಲಿಗೆ ವಾಪಸ್ಸು ಬರೋಣ…

ಇದು ಶ್ವಾನಪ್ರಿರಿರುವ ಬಹುತೇಕ ಎಲ್ಲಾ ವಲಯಗಳಲ್ಲೂ ದಾರಿಯಲ್ಲಿ ಬೆಳಬೆಳಗ್ಗೆ ಕೆಲಸಕ್ಕೆ ಹೊರಟಾಗ ಶುಭೋದಯ ಹೇಳಲು, ಸಂಜೆ ಹಿಂತಿರುಗಿ ಬಂದಾಗ ನಿಮ್ಮ ಪಾದಗಳ ಮುತ್ತಿಕ್ಕಿ ಸ್ವಾಗತಿಸಲು ಪ್ರೀತಿಯಿಂದ ನೀವು ಬರುವ ದಾರಿ ನೋಡುತ್ತಿರುತ್ತವೆ. ಇಲ್ಲವಾದಲ್ಲಿ, ವಿವಿಧ ಆಕಾರಗಳ, ವಿವಿಧ ಬಗೆಯ ನಾಯಿಗಳ ಪಟ್ಟಿ ಹಿಡಿದು ಅದಕ್ಕೆ “ವಾಕಿಂಗ್” ಮಾಡಲು ಕರೆತಂದಿರುವ ಮಹನೀಯ ದಾರಿಹೋಕರು ಕಾಣಸಿಗುತ್ತಾರೆ. ಅದೆಂತಹಾ ನಾಯಿಗಳೋ… ದೈತ್ಯಾಕಾರದ ನಾಯಿಗಳು, ಭೂತಾಕಾರದ ನಾಯಿಗಳು, ಇಲಿಯಾಕಾರದ ನಾಯಿಗಳು, ಮತ್ತು “ಮಿನಿ”, “ಮೈಕ್ರೋ” ನಾಯಿಗಳೂ ಸಹ! ದೈತ್ಯಾಕಾರದ ನಾಯಿಗಳು! ಮನಸ್ಸು ಮಾಡಿದರೆ ತಮ್ಮ ಶ್ವಾನಪ್ರಿಯನನ್ನು ಬೇಕೆಂದಲ್ಲಿ ಸಲೀಸಾಗಿ ಎಳೆದುಕೊಂಡು ಹೋಗುವಂತಿರುತ್ತವೆ. ಅವುಗಳ ಆಕಾರದಂತೆಯೇ ಅವುಗಳ ಹೇಲುಗಳೂ ಬೃಹದಾಕಾರದ ಹೇಲುಗಳು. (ಆದರೆ ಮಧ್ಯಮ, ಚಿಕ್ಕ ನಾಯಿಗಳ ಹೇಲೇನು ಬಹಳ ಕಮ್ಮಿಯಿರುವುದಿಲ್ಲ.) ಈ ನಾಯಿಗಳು ನಮ್ಮೂರಿನ ತಿರುಬೋಕಿ ನಾಯಿಗಳಂತಲ್ಲ ಸ್ವಾಮಿ, ಇವೇನು ಸಾಮಾನ್ಯ ಕಂತ್ರಿ ಕಜ್ಜಿ ನಾಯಿಗಳಾ? ಅಲ್ವೇ ಅಲ್ಲ! ನಿಲ್ಲು ಅಂದರೆ ನಿಲ್ಲುತ್ತವೆ, ಕೂರು ಅಂದ್ರೆ ಕೂರುತ್ತವೆ, ಆಡು ಅಂದರೆ ಆಡುತ್ತವೆ, ಮಲಗು ಅಂದರೆ ಮಲಗುತ್ತವೆ, ದಾರಿಯಲ್ಲಿ ಹೇಲು ಅಂದರೆ ಹೇಲುತ್ತವೆ. ಎಲಾ ಇವರಾ! ಎಷ್ಟೊಂದು ವಿಧೇಯ ಕುನ್ನಿಗಳು ನೋಡಿ. ಇವುಗಳು ಬೀದಿಯಲ್ಲಿ ಹೊರಳಾಡುವುದಿಲ್ಲ, ಎಲ್ಲೆಂದರಲ್ಲಿ ಮಲಗುವುದಿಲ್ಲ, ಸಿಕ್ಕಸಿಕ್ಕಿದುದೇನನ್ನೂ ತಿನ್ನುವುದಿಲ್ಲ. ಇವುಗಳು ದಿನವಿಡೀ ಮನೆಯೊಳಗೇ ಹಾಯಾಗಿ ಓಡಾಡಿಕೊಂಡು, ಶುಚಿಯಾಗಿರುವ ನೆಲದ ಮೇಲೆಯೇ ಹೊರಳಾಡಿಕೊಂಡು, ಪೆಡಿಗ್ರಿಯನ್ನೇ ಬಕಾಸುರನಂತೆ ತಿಂದುಕೊಂಡಿರುತ್ತವೆ. ಇವುಗಳು ಸಾಮಾನ್ಯ ಶ್ವಾನ ಪ್ರಜೆಗಳಲ್ಲ ಸ್ವಾಮೀ, “aristocratic” ಶ್ವಾನ ಪ್ರಜೆಗಳು. ಎಲ್ಲವೂ ಶುಚಿಯಾಗಿರಬೇಕು ಇವುಗಳಿಗೆ. ಆದರೆ ಹೇಲಲು ಸಾರ್ವಜನಿಕ ರಸ್ತೆಯೇ ಬೇಕು. ಇಲ್ಲವಾದಲ್ಲಿ, ಕಾಲುದಾರಿಯೇ* (*ಪ್ರೀತಿಯ ಕಂಗ್ಲೀಷ್ ಬಾಂಧವರೇ, ಕಾಲುದರಿಯೆಂದರೆ footpath) ಬೇಕು. ಆ ನಾಯಿಯ ಊಟ, ತಿಂಡಿ, ಸ್ನಾನ, ಓಡಾಟ, ಒಡನಾಟ ಎಲ್ಲಾ ಮನೆಯೊಳಗೆ. ಹೇತುಹಾಕೋ ಕೆಲಸವೊಂದು ಮಾತ್ರ ದಾರಿಯಲ್ಲಿ. ಭಲೇ ಕುನ್ನಿಗಳೇ ಇವುಗಳು! ಆದರೆ, ನಿಜವಾಗಿ ಹೇಳಬೇಕೆಂದರೆ, ಇದರಲ್ಲಿ ಆ ನಾಯಿಗಳ ತಪ್ಪಿಲ್ಲ. ಅಂತಹ ಶ್ವಾನಗಳು ಯಾವ ರೀತಿ ಜೀವಿಸುತ್ತದೆ? ಅದಕ್ಕೆ ಸ್ವಾತಂತ್ರವಿದೆಯೇ? ಯಾವತ್ತೂ ಕುತ್ತಿಗುಗೆ ಪಟ್ಟಿ, ಹುಟ್ಟಿನಿಂದ ಸಾವಿನವರೆಗೂ ಗೃಹ ಬಂಧನ. ಇದು ಯಾಕೆ ಪ್ರಾಣಿ ಹಿಂಸೆಯೆಂದು ಪರಿಗಣಿಸಲ್ಪದುವುದಿಲ್ಲ? ಪ್ರಾಣಿ ಹಿಂಸೆ ಹಾಗಿರಲಿ, ಈಗ ದಾರಿಹೋಕ ಹಿಂಸೆಗೆ ಬರೋಣ. ನಾಯಿ ಹೇಲು ಎಲ್ಲಿದೆಯೋ ಎಂದು ಹುಡುಕುತ್ತಾ ಓಡಾಡುವ ಸಾಹಸ ಯಾವತ್ತೂ ದ್ವಿಚಕ್ರ/ತ್ರಿಚಕ್ರ/ಚತುರ್ಚಕ್ರ ವಾಹನಗಳಲ್ಲೆ ಓಡಾಡುವ ಶ್ವಾನಪ್ರಿಯರಿಗೆಲ್ಲಿ ತಿಳಿದಿದೆ? ಕುರುಡು ಬಿ.ಬಿ.ಎಂ.ಪಿ ಯವರನ್ನು ಮರೆತುಬಿಡಿ, ತಮ್ಮ ನಾಯಿಯನ್ನು ದಾರಿಯಲ್ಲಿ ಹೇಲು ಹಾಕಿಸುವರನ್ನು ಹಿಡಿದು ೫೦೦ ರೂಪಾಯಿ ದಂಡ ಹಾಕಿದರೆ, ಓಳ್ಳೆಯ ಹಣ ಗಳಿಸಬಹುದಿತ್ತು ಅವರಿಗೆ. ಇಂತಹ ಶ್ವಾನಪ್ರಿಯರಿಗೆ, ನಾಲ್ಕೈದು ನಾಯಿಗಳನ್ನು ತಂದು ಅವರ ಬಾಗಿಲ ಎದುರೇ ಆ ನಾಯಿಗಳು ಹೇತು ಹಾಕುವಂತೆ ಮಾಡಬೇಕು, ಬುದ್ಧಿ ಬರಲು. ಮಂಗನ ಕೈಯಲ್ಲಿ ಮಾಣಿಕ್ಯವೆಂಬ ಗಾದೆ ಹಳತಾಯಿತು. “ಕೋತಿಯ ಕೈಯ್ಯಲ್ಲಿ ನಾಯಿ” ಎಂಬುದು ಹೊಸತು… ದುರದೃಷ್ಟಕ್ಕೆ, ಈ ಶ್ವಾನಮತ್ತ ನಾಗರೀಕರು (ಅನಾಗರೀಕರೆಂದರೆ ಹೆಚ್ಚು ಅರ್ಥಪೂರ್ಣ. ಅಲ್ವಾ..) ಈಚೆಗೆ ಜಾಸ್ತಿಯಾದಂತೆ ತೋರುತ್ತಿದ್ದಾರೆ. ಇವರ ಸಂಖ್ಯೆ ಹೀಗೆಯೇ ಹೆಚ್ಚುತ್ತಿದ್ದರೆ ಮುಂದೊಂದು ದಿನ ರಸ್ತೆಗೆ ಡಾಂಬರ್ ಹಾಕೋ ಅಗತ್ಯವೇ ಇರುವುದಿಲ್ಲ. ಜಲ್ಲಿಯಲ್ಲಿ ಮಿಶ್ರಿತ ನಾಯಿಹೇಲಿನ ಮೇಲೆಯೇ ರೋಡ್ ರೋಲರ್ ಓಡಿಸಿದರೆ ರಸ್ತೆ ಸಿದ್ಧ! ಡಾಂಬರ್ ಹಾಕಿ ಅದೇನು ಸಾಧಿಸಿದಂತಾಗುವುದು? ಹೇಗೂ ರಸ್ತೆ ನಾಯಿ ಹೇಲಲ್ಲೇ ಮುಳುಗುವುದು ತಾನೆ… ಅಲ್ಲ, ಅದ್ಯಾವ ಪುರುಶಾರ್ಥಕ್ಕಾಗಿ ಈ ಥರದ ನಾಯಿ ಸಾಕಣೆ? ರಸ್ತೆಯೆಲ್ಲ ನಾಯಿ ಹೇಲಿನ ಗೊಬ್ಬರ ಉತ್ಪಾದನೆ ಕೇಂದ್ರವನ್ನಾಗಿಸಲೇ? ನಮ್ಮಂತಹ ಬಡ ದಾರಿಹೋಕರ ಪಾದುಕೆಗಳ ಪಾವನಗೊಳಿಸಲೇ?

ನಂಗೊತ್ತಿಲ್ಲಪ್ಪಾ.....

ನಂಗೊತ್ತಿಲ್ಲಪ್ಪಾ…..

ಇಲ್ಲಿಯವರೆಗೆ ಓದಿದಾಕ್ಷಣ, ನಮ್ಮನ್ನೇ ಏಕೆ ದೂರುತ್ತೀರ? ಯಾವುದೋ ಬೀದಿನಾಗಳ ಕೃತ್ಯವನ್ನು ನಮ್ಮ ಮುಗ್ಧ ಕುನ್ನಿಯ ಮೇಲೆ ಯಾಕೆ ಹೊರಿಸುತ್ತೀರ? ಎಂದೆಲ್ಲ ಶ್ವಾನಪ್ರಿಯರು ಕೂಗಾಡಲು ಶುರುಹಚ್ಚಿಕೊಳ್ಳುತ್ತಾರೆ. ಶ್ವಾನಪ್ರಿಯರೆಂದರೆ ತಪ್ಪಾದೀತು. ನಿಜವಾದ ಶ್ವಾನಪ್ರಿಯಗೆ ಅವಮಾನವಾದೀತು. ಇವರು ಶ್ವಾನಮತ್ತರು. ಇವರು ಇರುವಂತಹ ಏರಿಯಾಗಳಲ್ಲಿ ಬೀದಿನಾಯಿಗಳು ಕಾಣಸಿಗುವುದೇ ಅಪರೂಪ. ಇನ್ನು ಕೊಳಗೇರಿಗಳ, ಬೇರೆ ಏರಿಯಾಗಳ ವಿಷಯ ಬಿಡಿ, ಅದು ಬೇರೆ ವಿಷಯ. ಇದು ಒಂಥರಾ ಎಲ್ಲಾ ಸಂಗತಿಗಳಲ್ಲೂ ನಮ್ಮಲ್ಲಿ ಕಂಡು ಬರುತ್ತೆ. ನಮ್ಮ ಮನೆ ಶುಚಿಯಾಗಿರಬೇಕು. ರಸ್ತೆಯಿರುವುದೇ ಕಸ ಹಾಕಲು, ಹೊಲಸು ಮಾಡಲು. ಅಲ್ಲವೇ? ಇನ್ನು ಚ್ಯೂಯಿಂಗ್ ಗಮ್ ತಿಂದು ಎಲ್ಲೆಂದೆರಲ್ಲಿ ಉಗಿಯುವವರು ಬೇರೆ. ಅವರೆಲ್ಲಾ ಹಾಗಿರಲಿ. ಇಂತಹ ಶ್ವಾನಮತ್ತರಿಗೆ ಏನು ಮಾಡಬೇಕು? ಇವತ್ತಿಗೆ ಇಷ್ಟು ರಗಳೆ ಸಾಕು. ಪ್ರಿಯ ದಾರಿಹೋಕರೇ, ನಿಮ್ಮ ಪಾದ ಪಾವನವಾಗದಂತೆ ಎಚ್ಚರ ವಹಿಸಿ.

ಇಂತೀ ನಿಮ್ಮ ಪ್ರೀತಿಯ,
ದಾರಿಹೋಕ


ಪ್ರಲೇಖ

©2009 Pradeep Hegde. All rights reserved.